Бүгін астаналықтардың телефонына жаппай сигнал келді. Министрліктер бұл жайтқа қатысты пікір білдірді, — деп хабарлайды ErtenMedia.
6 наурызда Астана тұрғындарының телефонына «Президенттік құлақтандыру» және «Ұлттық құлақтандыру» деген белгілермен жаппай хабарлама келді.
Төтенше жағдайлар министрлігі MasAlert жүйесін тексеру бойынша жүргізіліп жатқан техникалық жұмыстарға қатысы жоқ екенін мәлімдеді.
«Төтенше жағдайлар министрлігінің MasAlert жүйесін тексеру бойынша жүргізіліп жатқан техникалық жұмыстарға қатысы жоқ. ТЖМ MasAlert платформасын бақыламайды, басқармайды, оған техникалық қызмет көрсету, баптау немесе тестілеу үшін жауап бермейді», — деп жауап берді министрлік өкілдері.
ТЖМ қазақстандықтарды сабырлы болуға және дүрбелеңге бой алдырмауға шақырды.
«Төтенше жағдай кезінде шұғыл хабарламалар ТЖМ ресми арналары және ұялы байланыс арқылы беріледі», — деді олар.
Артынша Цифрлық даму, инновациялар және аэроғарыш өнеркәсібі министрлігі бүгін астаналықтар жаппай алған ұлттық құлақтандыруға қатысты пікір білдірді.
Астананы Cell Broadcast технологиясы бойынша төтенше жағдайлар кезінде жаппай құлақтандыру жүйесіне қосып жатыр.
«Бүгін Астанада қала тұрғындары мен қонақтарының телефонында ұлттық құлақтандыру іске қосылды. Қазір Астананы Cell Broadcast технологиясы бойынша төтенше жағдайлар кезінде жаппай құлақтандыру жүйесіне қосып жатырмыз», — деп жазылған хабарламада.
Бұл тестілеу режимінде жүргізілген. Министрлік өкілдері тұрғындарды алаңдамауға және тек ресми ақпарат көздеріне сенуге шақырды.
