Мәжіліс депутаты Еділ Жаңбыршин Қазақстанның қазіргі саяси ахуалы, елдегі даулы мәселелер төңірегінде пікір білдірді, — деп хабарлайды ErtenMedia.
Депутат Жаңбыршинге «шетелден қаржыландырылатын қоғамдық ұйымдар, қоғам белсенділері заң нормалары қабылданған кезде белсенділік танытады. Сондай жағдайлар болды ма?» деген сауал қойылды. Еділ Жаңбыршиннің сөзінше, мұндай кезде тіпті жеке басына қатысты түрлі ғайбат сөз айтылады.
«Мысалы, бұралқы иттерге қатысты білесіздер. Жануарларға жауапкершілікпен қарау дейтін заңның бастамасын көтергенбіз. Көптеген шет елдің заңын зерттедік. АҚШ-тың көптеген штатында, Еуропаның көптеген елінде, Ұлыбританияда көшеде жүрген бұралқы иттерді алып кетпесе, белгілі бір уақыттан кейін эвтаназия жасайды. Израильде де сондай норма бар. Соны біз заңға енгізген уақытта зооқорғаушылар өте белсенді қарсылыққа шықты. Әлі күнге дейін қарсылық көрсетіп жатыр. Олардың артында жаңа айтып отырған батыс елдерінің қаржысы тұрған деген ақпарат бар. Олар да қаржы алып, осы мәселені ушықтырып отыр. Бір қызығы, ақбөкендер, итбалықтар қырылып жатса, үндемейді. Итке келген уақытта құтырып кетеді. Өзіміздің арамызда депутаттар да бар. Баланың өмірінен иттің өмірі қымбат па деймін. «Итті қожайыны шығарып жіберген» дейді. Бала мүгедек болса, ана мүгедек болса немесе екіқабат әйел иттен қорқып, түсік тастап жатса, оған кім кінәлі?! Ол жағын ойламайды. Бірінші адамды қорғап алуымыз керек. Осыған келген уақытта шулап шыға келеді.
Тіпті жеке басыма үлкен жалалар жауып, жаман ғайбат мәселелер айтылады. Мен үндемей отырмын, Құдайдан табар деймін. Бұлар «жепутаттар, бұлар живодерлер, бұлар тамұқта өртенеді, бұлар қалай үйінде ұйықтап жүр, бұл адам емес, бұл айуан» дейтін пікірлер бар. Мен қарап отырамын. Бірақ басқа да ақпарат келіп жатыр ғой. Күні кеше Астанада үлкен апайды бірнеше ит талап тастады», — дейді ол Adal Adam арнасына берген сұхбатында.
Депутат Ресей, бұл елдің Қазақстанға көзқарасы турасында да сөз қозғады.
«Ресейге келетін болсақ, Ресейдің ішек-қарнымыз деп айтуға болады. 7 мың шақырым шекарамыз бар. Олар да мемлекет, олар да қорғанады, Қытай да, Америка да, барлық ел қорғанады. Қандай мемлекет болсын өзінің мүддесіне қарай жұмыс істейді. Бізге келген уақытта біз оның ең жақын көршісіміз. Әлемдегі ең ұзын шекара екеуміздің ортамызда. Біз быт-шыт болатын болсақ, Ресей быт-шыт болады деген сөз. Мәселе сонда. Ішек-қарынбыз, ақтарып тастаймыз.
Құдай сақтасын, Қазақстанда дүмпу болып, быт-шыт болып кететін болса, Ресей де быт-шыт болады. Қазақстанның мықты болғаны Ресейге де қажет. Себебі біз әлсіз болып, талқан болсақ, Ресей де талқан болады. Бәрі ашылып қалады. 7 мың шақырым ашылып қалады, 7 мың шақырымға әскер қоя алмайсың. Оған қаншама адам күші, ресурс керек?! Ол деген мүмкін емес. Біздің мықты болғанымыз — олардың қауіпсіздігі.
…Бізді шайқауға мүдделі емес деп ойлаймын. Сондықтан ОДКБ кіріп, бізді мемлекет есебінен ұстап қалғаны сол тұрғыдан болуы керек (Қаңтар оқиғасы кезінде — еск.). Бір жағынан бауырлас, дос ел болғаннан кейін бірнеше мемлекет болып қол қойған келісімшарт бар: олар стратегиялық нысандарды күзетіп, біздің әскерге әрі қарай жұмыс істеуге мүмкіндік берді», — деді Жаңбыршин сұхбатында.
Мәжіліс депутаты Украинадан кейін қазақстандықтардың бойында қалыптасқан үрей жайында да айтты.
«USАID сияқты агенттердің таратып жатқан ақпараты болуы мүмкін. Дезинформация. Шындығында бізбен соғысуға ешкім мүдделі емес деп ойлаймын. Себебі бізге соғыс ашатын болса, Түркі одағындағы мемлекеттер бізді қолдап шығады. Қытайға да Қазақстанның быт-шыт болып жатқаны керек емес. Оның өзіне тұрақтылық керек. Алпауыт мемлекеттерге экономикасы тұрақты дамуы үшін соғыс керек емес. Соғыс болған жерде дағдарыс басталады. Сондықтан Қазақстанның шайқалуы, үлкен апат болуы, ыдырауы Түркия, Қытай, АҚШ, Ресей сияқты мемлекеттерге керек емес. Барлығы инвестиция салып отыр, олардың компаниялары бізде жұмыс істеп жатыр», — деді депутат сұхбатта.
Еділ Жаңбыршин Қазақстанға ешкім соғыс ашпайтынын, басқа жол табатынын айтты.
«Соғыс ашпайды. Солтүстіктегі көршіміз газ бен мұнайдың крайнигін жауып тастайды. Бюджеттің алпыс пайызы мұнайдан келіп тұр. КТК-ның крайнигін жапса, Теңіздің, Қашағанның мұнайын қайда жібересің?! Қарашығанақтың газын жауып тастаса, қайда жібересің?! Бізде табыс әкеліп отырған үш үлкен жоба бар. Екі крайникті жабады, бітті, соғыс ашып, бас қатырып керегі жоқ. Соны көп адам түсінбейді. Айтуға тура келеді. Бірінші рет айтып отырмын. «Бізге соғыс ашады, солтүстік облыстарды басып алады» дейді. Басып алмайды. Екі крайникті жабады. Бюджетіңде ақша жоқ, халқың көтеріледі сосын. Жалақы жоқ, салық жоқ, сервистік компаниялар, тамақ өндіретін компаниялар тоқтайды» — деді ол сұхбатында.
Мәжіліс депутаты Еділ Жаңбыршин өзіне жасалған ақпараттық шабуылдардың себебін де түсіндірді.
«Бұрынғы жүйе, олигархтарға ұнамайтын заңдар қабылдаймыз, нормалар береміз, жобалар жасаймыз. Әй дейтін әже, қой дейтін қожасы жоқ, әр затты белден басып жүрген алпауыттарды шақырып алып, халық қалаулыларының алдында есеп бергізгендіктен, солардың төбесінде тұрғандарға және солардың мүдделес сыбайластарына ұнамауым мүмкін. Екіншіден, Парламентке келген уақытта оқыс сұрақтар қою, сын айту, Фостерге қатысты айтылған сындардың бәрі — солармен ауыз жаласқандарға, солардың қорғап, қолпаштап жүргендеріне ұнамауы мүмкін. Адамда қызғаныш деген болады. Өзі жете алмаған соң біреудің істеп жатқанын көре алмайды. Ондай да таза адами факторлар бар.
Біз қазіргі Президенттің саясатын жүргізетін адамбыз, ол кісі елді жаңа бағытқа бұрып, өзгерістер жасауға талпынып жатыр. Ол да бұрынғыларға ұнамайды. Өйткені жем жеп отырған астауынан, өздеріне келіп отырған майшелпектерінен, өздерінің схемаларынан айырылып жатыр. …Сондықтан ақпараттық шабуылдар болуы заңдылық. Бола да береді. Блогер, журналистерді шатастыру үшін құйтұрқы сұрақтарымен жібереді. Кейбіріне түсіп қаламыз, кейбіріне жауап беріп жатамыз. Ақпараттық «киллерлердің» жұмысын білеміз, біреу жасырын жасайды, біреу ашық жасайды», — деді депутат.
Сонымен қатар, Еділ Жаңбыршин «саяси мансабы өсуіне Президент әкімшілігінде бұрын басшы болған Аслан Мусин ықпал етті, крышасы» деген қауесетке жауап берді.
«Мусинмен өмірімде кездеспеппін. Ол кісімен түскен суретім болса, сұхбатта отырғаным болса, кездескенім болса, жариялауларына болады. Қандай да бір ақпарат фактімен дәлелденуі керек. Мені Ақтау қаласының әкімі қылып қойған сол кездегі Маңғыстау облысының әкімі — Бауыржан Мұхамеджанов. Сол кезде Президент әкімшілігінің жетекшісі Мусин болған. Бірақ ол кісімен қызмет бабында немесе бейресми кездеспеппін, жақын таныс емеспін. Сыртынан білемін, қарым-қатынасымыз жоқ. Адамды сендіргің келсе, өтірікті өкіртіп тұрып айт дейді ғой. Сондай ақпараттың бірі шығар. Мен туралы жазбаған бәлелері жоқ. Мені танитын адамдар, қызметтес болған азаматтар менің кім екенімді біледі, оған ақталмаймын да. Егер олар шектен шығып жатса, сотқа беремін немесе құқық қорғау органдарына арызданамын. Шектен шықпау керек», — деді депутат.
