АҚШ әскери ведомствосы белгісіз ұшатын нысандарға қатысты видеожазбалар мен құжаттардың жаңа топтамасын жариялады, деп жазады Ertenmedia.kz.
Жарияланған материалдардың ішінде 50 видео мен құжат бар. Олардың қатарында азаматтық тұлғалар мен әскери қызметкерлердің куәлік сипатындағы мәліметтері де қамтылған. Алайда видеолардың ешқайсысына нақты түсіндірме берілмеген. Сондықтан онда көрінген нысандардың табиғаты әзірге ашық сұрақ күйінде қалып отыр.
2019 жылы Таяу Шығыста түсірілген бір видеода Парсы шығанағы үстінде бір қатармен ұшып бара жатқан үш белгісіз нысан көрінеді. Пентагон дерегінше, кадрлар америкалық әскери кемедегі инфрақызыл датчик арқылы түсірілген болуы мүмкін.
2022 жылғы тағы бір видеода Иран жағалауындағы суларда кемелердің жанынан ұшып өткен төрт белгісіз нысан байқалады. Ал 2021 жылы Сирия аспанында түсірілген жазбада жұмбақ нысанның өте жоғары жылдамдықпен алыстап бара жатқаны көрсетілген.
Жарияланған видеолардағы нысандардың көбі көпшілік үйренген «ұшатын табақша» немесе диск пішініне ұқсамайды. Дегенмен 2022 жылғы қазан айында белгісіз жерде түсірілген бір кадрда тұрғын үй аумағына ұқсас жердің үстінен сигара тәрізді нысанның ұшып өткені байқалады.
Пентагон 8 мамырда да анықталмаған аномалды құбылыстарға қатысты 161 файл жариялаған еді. Сол кездегі мәлімдемеде жұртшылық бұл материалдардағы ақпарат бойынша өз пікірін қалыптастыра алады деп көрсетілген.
Әзірге АҚШ әскери ведомствосы жарияланған видеолардағы нысандардың шығу тегі, техникалық сипаты немесе нақты не екені туралы ресми қорытынды ұсынған жоқ. Сондықтан жаңа файлдар НЛО тақырыбына қызығатын жұрттың назарын аударғанымен, олар нақты жауаптан гөрі жаңа сұрақтарды көбейтіп отыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
