Алматыда тау кластерін дамыту мәселесіне арналған қоғамдық тыңдау барысында тарихи және археологиялық мұраларды сақтау мәселесі көтерілді, деп жазады Ertenmedia.kz.
Kazakh Tourism Dev. LTD бас атқарушы директоры Ержан Еркінбаевтың айтуынша, жоба бойынша қазақстандық ғалымдармен өзара жұмыс жүргізіліп жатыр. Атап айтқанда, сәулетшілердің ұстанымдары арнайы мамандандырылған институтпен талқыланған.
Спикер Көкжайлау аумағында ресми тіркелген сәулет ескерткіштері жоқ екенін айтты. Дегенмен жүргізілген зерттеулер нәтижесінде 123 археологиялық нысан анықталған.
Оның ішінде 46 нысан сақталады. Ал қалғандары бойынша музеификация жұмыстары жүргізіледі. Яғни археологиялық мұралар жойылып кетпей, ғылыми және туристік айналымға енгізілуі мүмкін.
Ержан Еркінбаевтың сөзінше, мұндай тәсіл тарихи мұраны қорғаумен қатар, Алматы маңындағы туристік бағыттардың мазмұнын байытады. Археологиялық нысандарды дұрыс таныстыру және сақтай отырып көрсету өңірге келетін туристер үшін жаңа мүмкіндік ашуы ықтимал.
Қоғамдық тыңдауда айтылған бұл мәселе Almaty Superski және тау кластерін дамыту жобалары тек инфрақұрылым салумен шектелмеуі керек екенін көрсетеді. Табиғи аумақтармен қатар, тарихи-мәдени мұра да мұқият қорғалуға тиіс. Туризмнің сапалы үлгісі – жол мен сервис қана емес, сол жердің тарихын, табиғатын және рухани қабатын сақтай білу.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
