Ербол Садыр Абай облысы әкімінің бірінші орынбасары болып тағайындалды. Журналист Нұрлан Жұмахан Ербол Садырдың мемлекеттік басқарудағы тәжірибесі және бұл тағайындаудың стратегиялық мәні жайлы талқылады, деп хабарлайды Ertenmedia.kz
Еліміздің мемлекеттік басқару жүйесі үшін өңірлік кадрлардың сапасы мен тәжірибесі – ұлттық деңгейдегі даму мен тұрақтылықтың негізгі іргетасы. Бұл қағидаттың тағы бір айқын дәлелі – Абай облысы әкімінің бірінші орынбасары лауазымына Ербол Әбілхайырұлы Садырдың тағайындалуы. Бұл тек әкімдік құрамындағы кадрлық өзгеріс қана емес, стратегиялық мәні бар, әкімшілік әлеуетті күшейтуге бағытталған шешім. Себебі, бұл тағайындау Абай облысы секілді жаңадан құрылған, институционалдық тұрақтылықты қажет ететін өңір үшін маңызды басқарушылық символикаға ие.
Ербол Садыр – ауылдық жерден бастап, қала және облыс деңгейінде мемлекеттік басқарудың әрбір сатысынан өткен тұлға. Ол – жүйелі әкімші, салалық басқару логикасын терең меңгерген технократ. Оның Түркістан облысында және республикалық маңызы бар Шымкент қаласындағы қызметі жергілікті басқарудың түрлі модельдерімен жұмыс істей алатынын көрсетті. Бұл жерде Түркістан өңірін «кадр ұстаханасы» деп айту – артық емес, өйткені соңғы онжылдықта мемлекеттік аппаратқа қызметке тартылғандардың бірқатары дәл осы өңірден шыққаны белгілі. Ол – тек географиялық ерекшелік емес, басқару мәдениетін қалыптастырудағы саяси мектептің нәтижесі.
Мұндай тәжірибені біз халықаралық саясаттан, әсіресе АҚШ-тың федеративтік жүйесінен де байқаймыз. Мысалы, АҚШ-тың әрбір штаты өз алдына шағын мемлекет іспетті. Штат губернаторлары тек әкімшілік емес, стратегиялық, кейде геосаяси маңызы бар шешімдер қабылдай алады. Калифорния, Техас, Флорида сияқты штаттарда қызмет атқарған губернаторлар кейін ұлттық саясатта маңызды рөл ойнап, Президент әкімшілігіне дейін өсіп шыққандары бар. Солардың ішінде Джордж Буш пен Рональд Рейган – губернаторлық тәжірибеден кейін Ақ үйге жол тартқан тұлғалар.
Мемлекеттік басқарудың бұл формасы тәжірибенің жинақтылығы мен саяси көшбасшылықтың сабақтастығын көрсетеді. Ербол Садырдың да аймақтық даму, әлеуметтік-экономикалық стратегиялар құра білуі – оны дәл осындай тарихи кезеңде Абай облысының бірінші басшылар тобының қатарына қосуға себеп болды. Бұл – оның бір ғана жеке жетістігі емес, бүкіл өңірлік басқару дәстүрінің эволюциясы. Жаңадан құрылған облысқа саяси-психологиялық тұрақтылық, институционалдық қалыптастыру мен халықтың мемлекеттік басқаруға деген сенімін арттыру үшін осындай тәжірибелі, салмақты кадр керек еді.
Абай облысы – тарих пен руханияттың алтын бесігі. Бірақ бүгінгі күннің өлшемі – тек мәдени символизммен шектеліп қалмай, әлеуметтік, экономикалық, инфрақұрылымдық жаңғырумен қатар жүруі тиіс. Ербол Әбілхайырұлының тәжірибесі осы бағыттағы жобаларды нақты жоспарлауға, тиімді жүзеге асыруға мүмкіндік береді. Мысалы, Түркістандағы көне қала мен жаңа әкімшілік орталықты қатар дамытқан менеджменттік тәжірибе Абай облысының орталығындағы Семей қаласын және өзге өңірлерді дамытуда да кәдеге жарайды.
Тағы бір назар аударарлық жайт – аймақаралық кооперация мен бюджетаралық трансферттер саясаты. Бұл – қазіргі мемлекеттік саясаттың маңызды компоненттерінің бірі. Жергілікті басқару органдары орталықпен ғана емес, өзара да серіктесе білуі қажет. Осы тұрғыда Ербол Садырдың тәжірибесі ұлттық жобалар мен халықаралық ынтымақтастық тетіктерін тартуға сеп болары анық. Қазіргі таңда облыстардың дамуы тек республикалық қаржыға қарап қалмауы тиіс. Іргедегі Қытай мен Ресей елдерімен экономикалық әріптестік орнату, ауыл шаруашылығы кооперацияларын құру, жасыл энергетикаға инвестиция тарту – осындай мықты әкімдік командалардың күн тәртібінде тұруы тиіс. Бұл жерде біз өңірлік менеджменттің экономикалық дипломатиямен тікелей байланысқанын көреміз.
Бұдан бөлек, әкімдік құрамында кадрлар жаңарып, жаңа есімдер қосылған кезде саяси мәдениет те жаңғыра түседі. Бұл – басқару аппаратындағы жауапкершілікті бөлісу ғана емес, жаңа идеялардың, тың тәсілдердің жол ашуы. Мемлекеттік басқару тілі заманауи, икемді, халыққа жақын болуы тиіс. Бұл жерде де Ербол Садырдың тәжірибесі және мемлекеттік идеологияны жеткізе алатын стилі үлкен рөл ойнайды.
Жалпы, өңірлік әкімдік құрамындағы әрбір өзгеріс – саяси сигнал. Ол тек басқару функциясының өзгерісі емес, қоғаммен диалог орнату тәсілінің, даму парадигмасының жаңа деңгейге шығуы. Абай облысының әкімдік құрылымын күшейту – мемлекеттің өңірлік даму стратегиясын кезең-кезеңімен жүзеге асырудағы келесі қадамы.
Қорыта айтқанда, Ербол Әбілхайырұлы Садыр – тек кадрлық таңдау емес, стратегиялық таңдау. Оның кәсіби биографиясы мен саяси болмысы Абай облысы сынды үлкен тарихи-мәдени жауапкершілік жүктелген өңірдің болашақ әлеуетін көтеруге жеткілікті. Бұл тағайындау – саяси жүйенің ішкі логикасына сай жүзеге асқан, ұлттық мүдде мен өңірлік тұрақтылықты ұштастыра алған шешім деп бағалауға болады. Ендігі жауапкершілік – бірге қызмет ететін әкімдік командасында, жергілікті халықта, және, әрине, осы сенімді ақтай алатын азаматтың өзінде.
