Көптеген ит иелері үйде өзін жақсы ұстайтын сүйкімді әрі тілалғыш үй жануарының далаға шыққан кезде иесін естімейтінін айтып шағымданады. Бұл өте кең тараған мәселе, бірақ кинологтардың айтуынша, оны түзетуге болады, деп жазады Ertenmedia.kz.
Ит үйретуде ең маңызды саналатын үш негізгі команда бар: «Болмайды!», «Маған кел!» және «Туалет!». Осы үш бұйрықты дұрыс меңгермеген ит иесін әбден әбігерге салуы мүмкін. Олар қашып кетеді, жердегі қоқысты теріп жейді немесе әдемі гүлзардың үстіне дәрет сындырады.
Күшікті үйге әкелген алғашқы күннен бастап үйрету қажет. Дегенмен, ересек ит те үйрене алады. Мұнда жас шектеуі жоқ, тек ересек жануарды үйрету үшін күшікке қарағанда көбірек күш пен шыдамдылық қажет болады.
Итті «Маған кел!» командасына үйретудің бірнеше маңызды кезеңі бар. Алдымен үй жануарыңыздың мотивациясын анықтап алыңыз. Мотивация екіге бөлінеді: азықтық және ойын арқылы. Көптеген иттер тағамды көбірек жақсы көреді, бірақ кейбірі тамаққа емес, сүйікті ойыншығына қызығады. Иттің осы ерекшелігіне мән беру маңызды.
Үйретуді қысқа қашықтықтан бастаңыз. Иттің бауын сәл бос ұстап, екі-үш қадам алшақтаңыз. Содан кейін нақты әрі қатты дауыспен «Маған кел!» деп айтыңыз. Иттің назарына тамақ немесе ойыншығын көрсетіңіз. Ол жаныңызға келген бойда мақтап, қалағанын беріңіз. Осы әрекетті қайталап, біртіндеп арақашықтықты ұзартып отырыңыз. Әр келген сайын мақтап, марапаттап отыруды ұмытпаңыз.
Итке сізге оралудың пайдалы әрі тиімді екенін көрсету – үйретудің негізгі мәні.
«Сіз үй жануарыңызды жаныңызда болудың жақсы екеніне үйретесіз. Сонда ол сізді ең жақсы таңдау деп біледі. Осылайша итті қауіпсіз жерлерде еркін жіберуге мүмкіндік аласыз», – дейді кинолог Шеннон.
Ит үйретуде тиімді болатын қосымша әдістер:
Алдымен итті есіміне тез жауап беруге үйретіңіз, кейін «есім + команда» түрінде бекітіңіз.
Ит сізге қарай жүгірмесе, керісінше одан алыстай бастаңыз, бұл оның сізді қуып жетуге деген қызығушылығын арттырады.
Команданы бірнеше рет қайталамай, анық әрі бір-ақ рет айтыңыз. Бұл итке тапсырманы түсінуге жеңілдік береді.
Иттің сабырлығын жаттықтырыңыз. Кез келген команда ит триггерлерге бірден елеңдемей, сабыр сақтай алғанда әлдеқайда тез меңгеріледі.
Жаттығу барысында үнемі позитивті көңіл күй сақтаңыз. Ит дұрыс жасаған әрбір әрекетін мақтап, марапаттап отырсаңыз, жануарыңыз тез арада логиканы түсініп, сіздің өміріңіз әлдеқайда жеңілдейді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
