Саясаткер Санжар Боқаевтың ұсталуына қатысты істің астарында экс-әкім Ерболат Досаевтың беделіне жасалған шабуыл мен Дариға Назарбаеваның ықпалын тежеу ниеті жатуы мүмкін деп хабарлайды Ertenmedia.kz.
Танымал журналист Гүлжан Ерғалиеваның пайымынша, ресми айыптар гранит ұрлығы мен тал-теректі заңсыз кесу сияқты ұсақ-түйек заңсыздықтар шынайы көрінбейді. Себебі Боқаев жүргізген репортаждарда Алматы әкімдігінің бюджетті талан-таражға салған әрекеттері, шенеуніктердің қала мүлкін жеке мүддеге пайдаланғаны нақты әшкереленген еді. Ерғалиеваның айтуынша, дәл осы дәлелді репортаждар Боқаевтың биліктің ішінен нақты ақпарат алып отырғанын аңғартады.
«Санжар әрекеттері тек азаматтық белсенділікпен шектелмейді, оның артында ұйымдастырылған саяси науқан тұруы мүмкін. Бұл бұрынғы Алматы әкімі Ерболат Досаевтың беделіне нұқсан келтіруге бағытталған», – дейді журналист.
Ерғалиева Досаевтың президент Тоқаевтың сенімді адамдар қатарына енгенін ескерсек, билік енді Алматы әкімдігіндегі Санжарды қажетті мәліметпен «қамтамасыз» еткен ақпарат көзін анықтауға тырысады деп санайды.
Боқаевтың азаматтық белсенділігіне сенуге бола ма?
Журналист Боқаевтың азаматтық белсенділігіне бұған дейін де күмәнмен қарағанын жасырмады. Себебі ADAM bol және ADAM журналдары әкімдік тарапынан қудаланған кезеңде, Боқаев қалалық ішкі саясат басқармасы басшысының орынбасары ретінде билікке ыңғайсыз БАҚ-тарды жабу ісімен айналысқан болатын.
«Типографияларда журналдардың басылуына тыйым салу, заңсыз тираждарды тәркілеу, журналистердің қатысуынсыз өткен сот процестері осының бәрінің басы-қасында Боқаев жүрді», – деп еске алады Ерғалиева.
Журналистің пікірінше, «бұрынғы Назарбаевтықтардың» ешқашан шын мәнінде биліктен алшақтауы мүмкін емес. Өйткені олардың қызметіндегі барлық құпиялар, табыстар мен жеңілістер бұрынғы қожайындарының сейфтерінде сақталған.
Бұл жерде Ерғалиева Санжар Боқаевтың Дариға Назарбаеваның және оның бұрынғы күйеуі Қайрат Шәріпбаевтың қасында кеңесші қызметін атқарғанын еске салады. Шәріпбаев басшылық еткен «ҚазТрансГазда» кейінірек ірі жемқорлық схемалары әшкереленген еді. Осыған байланысты Боқаев Назарбаева әулетінің былықтарына тікелей қатысы болуы немесе олардан хабардар болуы ықтимал деген пікір бар.
Тоқаев тазалау науқанын бастады ма?
Гүлжан Ерғалиева Боқаевтың ұсталуы жаңа Конституция күшіне енгеннен кейінгі Тоқаев билігінің саяси «тазалау» науқанының басталғанын көрсетеді деп санайды.
«Президент Тоқаевтың «сахна сыртындағы қуыршақ ойнатушылардың заманы өтті» деген сөзі бекер емес. Бұл билік элитасындағы ықпалды «ескі Қазақстанның» реваншистеріне қарсы үлкен күреске дайындық. Боқаев стратегиялық фигура емес, бірақ ол Назарбаеваның айналасындағылар туралы маңызды ақпарат көзі болуы мүмкін. Сондықтан АҚШ-тан Қазақстанға оралды, себебі оған келісімге келу ұсынысы түскен», – дейді журналист.
Сонымен қатар, Ерғалиева Оразалы Ержановтың да ұсталуы осындай себептен екенін болжайды. Оның пікірінше, билік енді жасырын немесе ашық түрде Тоқаевтың саясатына қарсы топтарды жаппай бейтараптандырады.
Себебі алда екі маңызды саяси науқан жаңа парламент және вице-президент сайлауы бар. Осы бір науқандар ың-шыңсыз, тыныш өтуі тиіс.
«Тоқаев кезінде биліктегі сенімсіз элементтерді люстрация арқылы тазартпаған еді. Қазір жаңа Конституцияны сылтау етіп, билік саяси тәуекелдерді алдын ала жоюға кірісті», – деп қорытындылады Гүлжан Ерғалиева.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
