Көктем жақындағанымен, ауа райы әлі суық, ал қозғалысқа деген құлшыныс төмен болуы мүмкін. Дегенмен дәл осы кезеңде физикалық белсенділікті сақтап қалу денсаулық үшін аса маңызды, деп жазады Ertenmedia.kz.
Қыс пен көктемнің басында күн қысқа, ауа райы салқын болғандықтан, ағза табиғи түрде баяу күйге көшеді. Сол себепті көп адам жаттығудан бас тартқысы келеді. Бірақ мамандар мұндай үзілістің зиян екенін айтады. Физикалық белсенділік иммунитетті күшейтіп, көңіл-күйді тұрақтандырады. Сонымен қатар суық тиюдің алдын алуға көмектеседі.
Егер сыртқа шығуға ерінсеңіз, жаттығуды үйден бастауға болады. Бөлмені желдетіп, қарапайым жаттығулар жасаңыз. Музыка қосып, өзіңізге ыңғайлы уақытта айналысу да мотивацияны арттырады.
Күн сайын ұзақ жаттығу міндетті емес. 10–15 минуттық қарапайым қимылдың өзі ағзаға пайда береді. Ең бастысы – алғашқы қадам жасау. Тұрақтылық негізгі шарт. Аптасына кемінде үш рет жаттығу жасап, жүктемені біртіндеп арттырған жөн. Бұл энергияны көбейтіп, сергектік береді.
Суық күндері тәбет те артады. Сондықтан артық салмақ қосу қаупі жоғары. Жаттығу бұл мәселені бақылауда ұстауға көмектеседі. Сонымен қатар жеткілікті мөлшерде су ішу маңызды. Егер жеңіл суық тиіп қалсаңыз, жаттығуды толық тоқтатудың қажеті жоқ. Тек қарқындылығын азайтыңыз. Ал дене қызуы 37,3 градустан жоғары болса, міндетті түрде демалған жөн.
Өзіңізге ұнайтын спорт түрін таңдаңыз. Қыста шаңғы, коньки, сноуборд, йога немесе бассейн сияқты бағыттарды байқап көруге болады.
Егер жүгіруді ұнатсаңыз, суық ауа райы кедергі болмауы тиіс. Тек дұрыс киініп, жаттығу алдында міндетті түрде қыздыру жаттығуларын жасаңыз. Қорытындысында, ауа райына қарамастан қозғалысты тоқтатпау – денсаулықтың басты кепілі.
Көз дәрігерлері көздің саулығын сақтап, көру қабілетін жақсарту үшін қажетті дәрумендер мен микроэлементтер туралы тілшілерімізге айтып берді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
