Қазақстанда 10 сәуір күні өңірлерде ауа райы құбылмалы болады. Солтүстік пен шығыс аймақтарда жауын-шашын түсіп, ауа салқындаса, оңтүстікте күн жылы әрі ашық болады деп хабарлайды Ertenmedia.kz.
Қазгидрометтің мәліметінше, солтүстік өңірлерде ауа райы айтарлықтай суытады. Петропавлда түнде қар аралас жаңбыр жауып, көктайғақ күтіледі, күндіз ауа температурасы +6…+8 °C шамасында сақталады. Қостанай мен Көкшетауда күн жаңбырлы болып, ауа +6…+10 °C-қа дейін ғана жылынады. Астанада да жауын-шашын болады, күндізгі температура +7…+9 °C аралығында болмақ.
Орталық аймақтарда ауа райы күрт құбылады. Қарағандыда күн жаңбырлы болып, температура +10…+12 °C аралығында сақталады. Ал Жезқазғанда күн ашық, температура +19…+21 °C-қа дейін көтеріледі.
Шығыс Қазақстанда Өскемен мен Семейде күн күркіреп, жаңбыр жауады. Мұнда күндізгі ауа температурасы +15…+18 °C шамасында болады.
Батыс аймақтарда жауын-шашын жалғасады. Оралда таңертең тұман түсіп, күндіз температура +12…+14 °C-қа жетеді. Атырауда күн күркірейді, Ақтөбеде түнде жаңбыр жауып, екпінді жел тұрады. Ал Ақтауда күн ашық, ауа температурасы +16…+18 °C аралығында сақталады.
Ең жылы ауа райы оңтүстік өңірлерде сақталады. Тараз бен Шымкентте күн ашық, ауа температурасы +20…+24 °C-қа жетеді. Түркістанда аздаған өткінші жаңбыр жауып, күн күркіреуі мүмкін. Ең жылы температура Қызылордада – +23…+25 °C, алайда таңертең тұман түседі деп күтілуде.
Оңтүстік-шығыс өңірлерде ауа райы тұрақсыз болады. Алматы мен Қонаевта түнде жаңбыр жауып, күн күркіресе, Талдықорғанда күндіз жауын-шашын жалғасады. Ауа температурасы +15…+22 °C аралығында болады деп күтілуде.
Жалпы республика бойынша көктемнің құбылмалы ауа райы сақталып, солтүстік, орталық және шығыс өңірлерде жауын-шашын түседі. Ал оңтүстік өңірлерде ауа райы жылы әрі ашық болып қала бермек.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
