Бүгін Талғардан тағы бір шұғыл хабар жетті. Марқұм Шерзат Болаттың ағасы да қаза тапты. Салтанат Нүкенованың ағасы осы жағдайға байланысты Талғарға баратындарын жеткізді, — деп хабарлайды ErtenMedia.kz.
«Бүгін Шерзаттың ағасы Нұрғанат Ғайыпбаевтың қайтыс болғаны туралы қайғылы хабар жеткенін хабарлаймыз. Нұрғанат пен Шерзат отбасына көңіл айтамыз.
Біздің команда Талғарға шығады», — деп жазды ол.
Айта кетейік, Салтанат Нүкенованың ағасы, құқық қорғаушы Айтбек Амангелді бұл істен алыс емес. Ол бұған дейін Шерзат ісінің егжей-тегжейін анықтау үшін заңгерлер тобы білек сыбана іске кіріскенін айтқан еді. Сондай-ақ, осы отбасының мүддесін қорғау міндеті екенін де жеткізді.
Айтбек Амангелді бұған дейін марқұмның отбасына бір рет қоқан-лоқы жасалғанын айтты.
“Біз іске араласқан сәттен бастап Шерзаттың әкесіне бір рет тікелей қоқан-лоқы жасалған. Бейтаныс адамдар Қаржаубайға адвокат көмектескісі келеді деген желеумен телефон тұтқасын алуын өтінген. Телефон арқылы Каржаубайға: «Егер тыныш жүрмесең, ұлыңның қасынан көріңді дайындап қой’, деген”, — деді ол.
Еске салайық, бүгін Алматы облыстық полиция департаменті Талғар қаласының маңынан 30 жастағы ер адамның денесі табылғанын хабарлады. Алдын ала мәліметтерге сәйкес, ол асылып, өз-өзіне қол жұмсаған.
«Марқұм биыл 4 қазанда қайғылы жағдайда қаза тапқан кәмелетке толмаған Шерзат Болаттың ағасы екені анықталды. Бұл дерек бойынша қылмыстық іс қозғалды. Қазір барлық жағдайды анықтау үшін тергеу жүргізіліп жатыр. Қылмыстық сипаттағы қандай да бір белгілер анықталмады», — деп хабарлады полиция.
Полиция марқұм Шерзат Болаттың отбасы барлық уақытта полицейлердің қорғауында болғанын мәлімдеді.
«Марқұмның отбасына қатысты қандай да бір қауіп-қатер тіркелген жоқ. Күзеткен қызметкерлердің сөзінше, ер адам күзетілетін нысаннан сағат 23:30-да шығып, жеке көлікпен кетке. Тергеу мүддесі үшін өзге де ақпарат жарияланбайды», — деп жазылған хабарламада.
Полиция тек ресми дереккөздерге сенуді сұрады. Сондай-ақ, жалған ақпарат тарату қылмыстық жауапкершілікке дейін әкелуі мүмкін кенін еске салды.