Ішкі істер министрлігі ірі кикшеринг компанияларын қауіпсіздік шараларын күшейтуге міндеттеді. Бұдан былай Jet, Yandex, Woosh, Bolt және Бірыңғай микромобильді оператор полицейлермен бірге тәртіпті бақылауға шығады, деп хабарлайды Ertenmedia.
Самокатты бейберекет қойып кететіндерге тосқауыл қойылады. Жүргізуші енді арнайы тұраққа қоймаса, сапарын аяқтай алмайды. Сонымен қатар жаяу жүргіншілер жолында, саябақтарда және адам көп жиналатын жерлерде самокат автоматты түрде бұғатталады.
ІІМ-нің мұндай қадамға баруына жол-көлік оқиғаларының күрт көбеюі, самокаттарды қалай болса солай қалдырып кету және веложолақтардың жетіспеуі себеп болған.
Елімізде жыл басынан бері электросамокаттарға қатысты 213 жол-көлік оқиғасы тіркеліп, 224 адам жарақат алды. Оның ішінде 42 оқиға самокат тізгіндегендердің кінәсінен болған. Барлық заңбұзушылықтың 95 пайызы Алматы қаласына тиесілі.
«Жол қозғалысы туралы заңға өзгерістер екі жыл бұрын енгізілсе де, жағдай жақсарған жоқ. Кикшеринг қызметтерінің қауіпсіздікті қамтамасыз ету жұмыстары тиісті деңгейде емес», – дейді министрлік өкілдері.
ІІМ мәселені шешу үшін төмендегі шараларды ұсынды:
- мобильді қосымшаларды жетілдіру (ескерту хабарламалары, дұрыс емес тұрақта сапарды аяқтауға тыйым салу);
- қозғалыс пен тұраққа қоюды қатаң бақылау;
- ереже бұзғандарға жауапкершілікті күшейту (айыппұл, техниканы тәркілеу, оператор арқылы жаза қолдану);
- инфрақұрылымды дамыту (веложолақтар мен арнайы тұрақ аймақтары).
- Кикшеринг қызметтері бұл шаралардың бірқатарын жақын арада енгізуге уәде етті.
Айта кетейік, бұған дейін Алматыда электросамокат тізгіндеген бойжеткен жаяу жүргіншіні қағып кетіп, оқиға орнынан ізін суытқан болатын. Зардап шеккен әйел ауруханаға жеткізілді.
