Абай облысының алдағы қысқа дайындығы тұтас өңірдің өмір сүру сапасына тікелей әсер ететін стратегиялық міндет. Облыс әкімі Берік Уәли төрағалық еткен жиында жылу маусымына әзірлік пен ауызсу инфрақұрылымы негізгі тақырыпқа айналды. Кеңеске қатысушылардың қатарында басқарма басшылары, көмір тасымалымен айналысатын кәсіпорын өкілдері, сондай-ақ барлық аудан мен қала әкімдері болды, – деп хабарлайды Ertenmedia.kz Абай облысы әкімінің баспасөз қызметіне сілтеме жасап.
Энергетика, ТҮКШ, денсаулық сақтау мен білім саласы басшылары өз бағыттары бойынша есеп беріп, өңір басшысына нақты ахуалды баяндады. Әсіресе, жылу көздері мен әлеуметтік нысандардың дайындығы жіті назарда болды.
Жиында кемшіліктердің беті ашылды. Кейбір аудан әкімдері дайындық жұмыстарына салғырт қарап, мерзімдік графикті кешіктіргені белгілі болды. Аймақ басшысы мұндай немқұрайлылықты өткір сынға алды.
Ауызсу тапшылығы да – өңірдің біраз бөлігі үшін шешімін күткен мәселе. Халықтың тұрмыс сапасы инфрақұрылымға тікелей байланысты. Жобалардың кестеден кешігуі – тек мердігердің мәселесі емес, әкімдіктің де бақылау функциясының әлсіздігін көрсетеді. Сондықтан облыс әкімі нақты тапсырмалар беріп, жауапты тұлғалардан іске жауапкершілікпен қарауды талап етті.
– Қыс дегеніміз – тек суық мезгіл емес. Бұл әкімдердің, басқармалардың нағыз сынға түсетін уақыты. Жылу жүйесі мен ауызсу мәселесі – адам өміріне тікелей қатысты. Бір жерде ақау шықса, салдары өте ауыр болуы мүмкін. Сондықтан барынша қырағылық керек, – деді облыс әкімі.
Мәселе үкімет деңгейінде бірнеше рет көтерілген. Ендігі жерде оны аудан әкімдерінің салғырттығымен түсіндіру қиын. Халық жылуды да, суды да уақытында талап етеді. Ендеше дайындық кешікпей аяқталуы тиіс. Бұл тек есеп беру үшін емес, шынайы ахуалды жақсарту үшін қажет. Себебі ауызсу мен жылу – жай көрсеткіш емес, өңір халқының сенімі мен мемлекетке деген көзқарасына тікелей әсер ететін фактор.
Жиын барысында «жылуға дайынбыз» деген құрғақ сөздер емес, нақты атқарылған іс пен оның сапасы талап етілді. Бұл жиын – әкімдік тарапынан берілген ескерту ғана емес, әрекетке шақырудың ашық сигналы.
