Каспий құбыр консорциумының (КҚК) Новороссийск порты аумағындағы теңіз терминалына жасалған шабуылдан кейін еліміздің Энергі министрлігі экспортқа арналған мұнай көлемін шұғыл түрде балама бағыттарға бұру туралы шешім қабылдады, деп жазады Ertenmedia.
Министрлік азаматтық маңыздағы инфрақұрылым нысандарына күш қолдануды халықаралық талапқа қайшы әрекет деп санайды.
«Каспий құбыр желісі халықаралық маңызға ие энергетикалық жоба. Оған қарсы жасалған кез келген күш көрсету әрекеті жаһандық энергетикалық қауіпсіздікке тікелей қатер төндіріп, Астананы қоса алғанда, консорциум мүшелерінің экономикалық мүддесіне айтарлықтай нұқсан келтіреді», – деп атап өтті ведомство.
Мұнай өндірудің тұрақтылығын сақтап, оқиғаның салдарын барынша азайту үшін министрлік экспорттық мұнай ағынын шұғыл түрде басқа маршруттарға бұру жоспарын іске қосқан.
Қазіргі уақытта жағдай Үкіметтің ерекше бақылауында.
Оқиға бүгін, 29 қараша күні Астана уақытымен таңғы сағат 06:06-да тіркелген. Теңіз терминалының ВПУ-2 шығару айлағына экипажсыз жүзу құралдарымен шабуыл жасалған.
Порт капитаны терминалдағы мұнай тиеу операцияларын дереу тоқтатып, танкерлер акваториядан шығарылды. Қызметкерлер мен мердігерлер арасында зардап шеккендер жоқ. Қауіпсіздік жүйелері автоматты түрде іске қосылып, мұнай құбырлары дер кезінде жабылды. Теңізге мұнай төгілмеген.
КҚК баспасөз қызметі ВПУ-2 айлағының айтарлықтай зардап шеккенін мәлімдеп, қауіпсіздік толық қамтамасыз етілгенше, оның пайдалануға жарамсыз екенін жеткізді.
Ведомство өкілдерінің айтуынша, оқиға консорциум инфрақұрылымына жасалған үшінші шабуыл. Бұған дейін «Кропоткинская» мұнай айдау станциясы мен КҚК-ның Новороссийск қаласындағы әкімшілік кеңсесіне шабуыл жасалған еді.
Каспий құбыр консорциумы Қазақстан, Ресей, АҚШ және Батыс Еуропаның ірі энергетикалық компаниялары бірігіп жүзеге асырып отырған жоба. Осының арқасында қазақстандық Теңіз, Қашаған және Қарашығанақ кеніштерінен мұнай тасымалданып отыр. 2024 жылы КҚК арқылы 63 миллион тонна мұнай экспортталса, оның шамамен 74 пайызын шетелдік жүк жөнелтушілер («Теңізшевройл» («Шеврон»), «ЭксонМобил», «Қазмұнайгаз», «Эни» және «Шелл») құраған.
Тұшымды контентті Ertenmedia-ның телеграм арнасынан оқыңыз.
