Қазақстанда зейнетақы жүйесін реформалаудың үш нұсқасының біреуі маусым айының соңына дейін таңдалады, деп жазады Ertenmedia.kz.
Бұл туралы Үкіметтегі брифинг барысында Еңбек және халықты әлеуметтік қорғау министрі Асқарбек Ертаев мәлімдеді.
Министрдің айтуынша, қазіргі уақытта арнайы жұмыс тобы зейнетақы жүйесін жаңғыртуға қатысты үш түрлі ұсынысты қарастырып жатыр.
Олардың біріншісі – жинақтаушы жүйеге негізделген «4+1» жобасы. Екінші нұсқа Мемлекеттік әлеуметтік сақтандыру қоры ұсынған сақтандыру зейнетақысы моделіне қатысты. Ал үшінші ұсыныс Сенат депутаттарының бірінен түскен.
Бұл бастамаға сәйкес, азамат 40 жыл еңбек өтілін жинаған жағдайда зейнетке ертерек шығу мүмкіндігі қарастырылады.
Асқарбек Ертаевтың сөзінше, аталған жобалардың барлығы жұмыс тобының отырыстарында талқылануда. Маусым айының соңына дейін қай бағыт бойынша реформа жүргізілетіні анықталып, ресми түрде жарияланады.
Сонымен қатар министр қазіргі таңда зейнеткерлік жас мәселесі қайта қаралып жатқан жоқ екенін айтты.
Қолданыстағы тәртіп бойынша ерлер үшін зейнеткерлік жас – 63 жас. Әйелдер үшін ол 2028 жылға дейін 61 жас деңгейінде сақталады. Одан кейін 2032 жылға дейін кезең-кезеңімен 63 жасқа дейін көтеріледі.
Бұған дейін Асқарбек Ертаев лайықты зейнетақы алудың басты шарты ретінде азаматтардың еңбек өтілін үзбей қалыптастыру қажеттігін атап өткен болатын. Оның пікірінше, тұрақты еңбек қызметі мен жүйелі аударымдар болашақтағы зейнетақы көлеміне тікелей әсер етеді.
Алдағы шешім Қазақстанның зейнетақы жүйесін жаңғыртудағы маңызды қадамдардың біріне айналмақ. Себебі халықтың қартаюы, еңбек нарығындағы өзгерістер және әлеуметтік міндеттемелердің артуы жаңа тәсілдерді талап етіп отыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
