Жасанды интеллект пен робототехника саласында жаңа кезең басталуы мүмкін. АҚШ-тағы Eka стартапы адам қолының икемділігіне жақындайтын жаңа роботтандырылған манипуляторды таныстырды, деп жазады Ertenmedia.kz.
Робототехникадағы ең үлкен мәселелердің бірі – ұсақ әрі нәзік заттармен жұмыс істеу болатын. Өнеркәсіптік роботтар ауыр бөлшектерді оңай көтергенімен, бүлдірмей құлпынай ұстау, шам бұрау немесе кілтті дұрыс бағытқа бұру секілді әрекеттер олар үшін күрделі міндет болып келді.
Массачусетс штатындағы Eka компаниясы осы мәселені шешуге жақындағанын мәлімдеді. Стартаптың негізін Массачусетс технологиялық институтының профессоры Пулкит Агравал мен Google DeepMind зерттеушісі болған Туомас Хаарноя қалаған.
Компания дәстүрлі роботтарды оқыту әдісінен бас тартып, Vision Force Action (VFA) деп аталатын жаңа модельді қолдануда. Бұл жүйе роботқа тек көру арқылы емес, физикалық күштерді түсіну арқылы да шешім қабылдауды үйретеді.
Әдетте роботтар миллиондаған сурет пен бейне арқылы оқытылады. Бірақ шынайы өмірдегі әр заттың пішіні, салмағы және орналасуы әртүрлі. Мысалы, құлпынайдың әрқайсысы бір-біріне ұқсамайды. Бірі жұмсақ, бірі қатты, бірі дымқыл болуы мүмкін. Мұндай жағдайда роботтың дұрыс әрекет етуі қиын.
Eka жасаған жүйе мыңдаған сағаттық виртуалды симуляция арқылы физика заңдарын үйренеді. Робот масса, ауырлық күші, үйкеліс және инерция секілді факторларды есепке алып әрекет етеді. Соның арқасында ол бұрын күрделі саналатын тапсырмаларды орындай бастады.
Wired басылымының дерегіне сәйкес, робот құлаққап тығынын, тарақты, кілтті және басқа да ұсақ заттарды ұстап көрсете алған. Сондай-ақ ол қозғалып тұрған конвейердегі тауық наггеттерін сұрыптауды да орындаған.
Сарапшылар мұны маңызды жетістік деп бағалайды. Өйткені азық-түлік өндірісі, ауыл шаруашылығы және логистика салаларында көптеген жұмыс әлі күнге дейін адам қолымен атқарылады. Егер роботтар нәзік өнімдермен қауіпсіз жұмыс істей алса, автоматтандырудың ауқымы бұрынғыдан әлдеқайда кеңейеді.
Алайда мұндай технологияның екінші жағы да бар. Goldman Sachs сарапшыларының бағалауынша, жасанды интеллект пен автоматтандыру алдағы жылдары әлем бойынша 300 миллионға жуық жұмыс орнына әсер етуі мүмкін. Ал Дүниежүзілік экономикалық форум 2030 жылға қарай роботтар мен автоматтандыру көптеген компанияның жұмыс моделін түбегейлі өзгертетінін болжайды.
Сондықтан Eka жобасы тек инженерлік жетістік емес. Ол еңбек нарығының болашағына қатысты үлкен пікірталастың бір бөлігіне айналып отыр. Бүгін құлпынай сұрыптаған робот ертең қоймада, фабрикада немесе ауыл шаруашылығында мыңдаған адамның жұмысын атқаруы мүмкін.
Сарапшылардың пікірінше, басты сұрақ роботтардың не істей алатынында емес, қоғамның мұндай өзгерістерге қаншалықты дайын екенінде болып тұр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
