Алғашқы шақырылымдағы Құрылтай жаңа Конституцияның қағидаларын заң жүзінде орнықтырып, мемлекеттік шешім қабылдау тәсілін өзгертуге тиіс. Мәжілістің экс-төрағасы Ерлан Қошанов 23 тамызда өткен сайлаудан кейін жаңа өкілді органға жүктелетін тарихи жауапкершілік туралы айтты, деп хабарлайды Ertenmedia.kz.
Қошанов Құрылтай депутаттарын алғаш рет халықтың тікелей сайлауын Қазақстанның саяси дамуындағы жаңа кезең деп бағалады. Оның айтуынша, бір айға созылған науқанда партиялар өзара бәсекеге түсіп, бағдарламаларын қоғам талқысына ұсынды.
Сайлаушылар саяси ұйымдарды ұранына қарап емес, олардың ұсынысы мен елдегі нақты мәселелерге жауап беру қабілетіне қарай бағалай бастаған.
«Азаматтар партияларды ұрандарының дабырасына қарап емес, бағдарламасының мазмұнына, ұсыныстарының нақтылығына және қоғамның шынайы сұранысына жауап беру қабілетіне қарай бағалады», – деді Ерлан Қошанов.
Мәжіліс төрағасы сайлау науқаны қоғамның саяси санасында өзгеріс жүргенін аңғартты деп есептейді. Азаматтар мемлекеттік маңызы бар мәселелерден шет қалмай, сайлау мен референдумға белсенді қатыса бастаған.
Оның пайымынша, соңғы жылдары жүргізілген реформалар сайлау мен референдумды елдің қоғамдық-саяси өміріндегі қалыпты құбылысқа айналдырды. Қоғам мемлекеттік шешімдерді сырттай бақылаушы рөлінен біртіндеп арылып келеді.
«Азаматтарымыз енді жай ғана сырттай бақылаушы емес. Олар маңызды шешім қабылдауда мемлекеттің белсенді әрі жауапты серіктесіне, болашақ Қазақстанның толыққанды авторына айналды», – деді ол.
Қошанов реформаның мәні жаңа өкілді орган құрумен шектелмейтінін атап өтті. Құрылтайдың пайда болуымен мемлекеттік шешім қабылдаудың бүкіл қисыны өзгеруге тиіс.
«Азаматтың дауысы мен заңның арасындағы қашықтық қысқарады. Құрылтайдың ықпалы артып, оның шешімдері әлдеқайда салмақты болмақ», – деді Мәжіліс төрағасы.
Ерлан Қошанов алғашқы шақырылым депутаттарына айрықша жауапкершілік жүктелетінін айтты. Олар қолына қатардағы депутаттық куәлік емес, қоғам сенімінен туған тарихи мандат алады.
«Жаңа Конституциядағы әділдік, заңдылық, жауапкершілік және адамды құрметтеу қағидаларын қабылданатын заңдар арқылы күнделікті өмірімізге берік орнықтыру – алғашқы Құрылтай депутаттарының міндеті», – деді ол.
Жаңадан сайланған Құрылтай саяси институттарды дамыту, мемлекет пен қоғам арасындағы байланысты күшейту және азамат үнінің билік шешімдеріне ықпалын арттыру бағытындағы жұмысты жалғастыруы керек.
Қошановтың пікірінше, сайлау қазақстандықтардың елдің алдағы бағытын айқындауға дайын екенін көрсетті. Ендігі сын науқан кезінде айтылған ұсыныстарды заңға айналдырып, сайлаушы сенімін нақты іспен ақтау.
Сөз соңында Мәжіліс төрағасы қазақстандықтарды сайлаудың өтуімен, ал Құрылтайға өткен партияларды жеңісімен құттықтады. «Бұл бәріміз бірге жүріп өтетін үлкен жолдың бастауы», – деп түйіндеді Ерлан Қошанов.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
