Шымкентте жастардың қаржылық сауатын арттыруға арналған «Қаржы сақшысы» республикалық интеллектуалды ойыны өтті. Бес өңірден келген 126 команда алаяқтық, лудомания және дропперлікке қарсы білімін ортаға салды, – деп жазады Ertenmedia.kz.
Ауқымды сайысты Шымкент қаласы бойынша Экономикалық тергеп-тексеру департаменті қала әкімдігінің қолдауымен ұйымдастырды. Жоба «Заң мен тәртіп» қағидаты аясында өткізіліп, жастар арасында қаржылық қауіпсіздік мәдениетін қалыптастыруды көздеді. Ойынға бес өңірден барлығы 1260 адам қатысты.
Салтанатты ашылу рәсімінде Шымкент қаласы мәслихатының төрағасы, «Әділет» партиясы қалалық филиалының төрағасы Мұрат Жоджыхожаев сөз сөйледі. Қатысушыларға қала әкімінің бірінші орынбасары Айдын Кәрімов те сәттілік тіледі. Экономикалық тергеп-тексеру департаментінің басшысы Бақыт Қайшыбеков қаржылық сауаттың жастар өміріндегі маңызына тоқталды.
Интеллектуалды ойында қатысушылар бірнеше маңызды бағыт бойынша сынға түсті. Сұрақтар қаржылық қауіпсіздік, интернеттегі алаяқтық схемалар, құмар ойынға тәуелділіктің алдын алу және қаржылық құқық бұзушылық тақырыптарын қамтыды. Дропперлікке, яғни қылмыстық жолмен алынған ақшаны өз шоты арқылы өткізуге қатысты тапсырмаларға ерекше көңіл бөлінді.
Ұйымдастырушылардың айтуынша, алаяқтар жастарды «жеңіл табыс», «картаңды уақытша бере тұр» немесе «ақша аударып берсең, сыйақы аласың» деген ұсыныстармен жиі арбайды. Мұндай әрекетке келіскен адам өзінің қылмыстық схемаға қатысып кеткенін кеш түсінуі мүмкін. Сондықтан қаржылық қауіпсіздік ережелерін теория жүзінде білу ғана емес, күмәнді ұсынысты дер кезінде ажырату маңызды.
Сайыс қорытындысында бірінші орын алған командаға 1 миллион теңге берілді. Екінші орын иегерлеріне 500 мың теңге, үшінші орынға 300 мың теңге табысталды. Финалға жолдама алған тағы он команда 100 мың теңгеден сыйақы иеленді.
«Қаржы сақшысы» жарыс пен жүлде үлестірумен шектелген жоқ. Қатысушылар банк картасы, жеке дерек пен телефонға келген кодтың қауіпсіздігіне адамның өзі жауапты екенін тәжірибелік тапсырмалар арқылы меңгерді. Мұндай білім жастарға жалған инвестиция, онлайн несие және құмар ойын төңірегіндегі тәуекелдерді дұрыс бағалауға көмектеседі.
Жоба қаржылық сауаттың қазіргі қоғамдағы қауіпсіздік құралына айналғанын көрсетті. Алаяқтық тәсілдер жаңарып отырған кезеңде жастарды қорқытып сақтандыру жеткіліксіз, оларға нақты жағдайдан шығу жолын үйрету қажет. Шымкентте өткен ойын осы міндетті интеллектуалды бәсеке арқылы орындауға мүмкіндік берді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
