Батыр Бахромұлы Құдіратқожаев Өзбекстанның Қорғаныс министрі болып тағайындалды. Шұхрат Халмұхамедов басқа жұмысқа ауысуына байланысты қызметінен босатылды. Тағайындау туралы ресми хабарламада оның бұдан былай қайда жұмыс істейтіні көрсетілмеген, деп хабарлайды Ertenmedia.kz.
Қызметтік тәжірибе мен өмірбаяндағы айырмашылықтар
Екі басшының қызметтік өмірбаянына көз жүгіртсек, олардың тәжірибесінде айтарлықтай айырмашылық барын байқауға болады: Халмұхамедов әскери басқару мен Бас штаб жүйесінде жоғары лауазымдарды атқарса, Құдіратқожаевтың қызметі негізінен әскери прокуратурамен, құқық қорғау органдарымен және ведомстволарды басқарумен байланысты.
Шұхрат Халмұхамедов қандай басшы болды?
Ол Қорғаныс министрі лауазымына 2024 жылдың қарашасында келген еді. Оған дейін, 2021 жылдың наурызынан бастап, Қорғаныс министрінің бірінші орынбасары — Қарулы күштер Бас штабының бастығы қызметін атқарды. Яғни ол министрлікке тікелей әскери жоспарлаумен және әскерді басқарумен айналысатын құрылымнан келді.
Бұған дейін ол Қорғаныс министрінің қару-жарақ және әскери техника жөніндегі орынбасары, Президент жанындағы Қауіпсіздік кеңесі хатшысының орынбасары және Төтенше жағдайлар министрінің орынбасары қызметтерін атқарған. 2016 жылы «Қызметтегі еңбегі үшін» медалімен марапатталған.
Халмұхамедовтің Бас штаб бастығы қызметіндегі кезеңінде әскердегі байланыс және басқару жүйелерін жаңғыртуға, сондай-ақ тактикалық буындағы штабтарға цифрлық платформаларды интеграциялауға баса назар аударылды. Осы жұмыстар аясында әскер түрлерінің өзара іс-қимылын пысықтау бойынша, соның ішінде Ұлттық ұлан бөлімшелерін тарта отырып, ведомствоаралық оқу-жаттығулар өткізілді. Өз лауазымы шеңберінде Түркияның әскери ведомствосымен тығыз байланыс орнатты.
Батыр Құдіратқожаев кім?
Жаңа министр 1975 жылы Ташкентте туған. 1997 жылы Ташкент мемлекеттік заң институтын бітірген. Еңбек жолын Әскери прокуратураның кадрлар бөлімінде бастап, кейін тергеуші және әскери прокурор қызметтерін атқарды. 2010–2012 жылдары Шығыс әскери округінің әскери прокуроры, ал 2012–2014 жылдары республикалық Әскери прокурордың бірінші орынбасары болды.
Кейін Құдіратқожаев Сұрхандария облысының, Ташкент қаласының және Хорезм облысының прокуратураларын, сондай-ақ Мәжбүрлеп орындату бюросын басқарды. 2022 жылдан 2025 жылға дейін Әскери прокурор қызметін атқарды. Осылайша, ол әскери жүйеге жат емес, бірақ оның негізгі тәжірибесі әскерге қолбасшылық етумен емес, заңдылық пен бақылауды қамтамасыз етумен байланысты.
Соңғы екі жылда оның мансабында бірнеше өзгеріс болды. 2025 жылғы ақпанда Төтенше жағдайлар министрі болып тағайындалса, 2026 жылғы қаңтарда Ішкі істер министрінің бірінші орынбасары — Жедел-іздестіру департаментінің бастығы болды. Енді міне, оған Қорғаныс министрлігін басқару тапсырылды.
ТЖМ-ді басқарған кезеңде (2025 жылғы ақпан — 2026 жылғы қаңтар) Құдіратқожаев төтенше жағдайларға ден қою уақытын орта есеппен 18%-ға қысқартуға мүмкіндік берген бірыңғай цифрлық мониторинг платформасын енгізуге жетекшілік етті.
ІІМ-де ол жедел-іздестіру іс-шараларын регламенттеуге және жедел әрекеттерді жүргізу кезінде заңдылықтың сақталуын бақылауды күшейтуге ерекше назар аударды — бұл жұмыс 2026 жылдың басында жарияланған ІІМ-нің ведомстволық әдістемелік ұсынымдарында көрініс тапты.
Жаңа министрден не күтуге болады?
Құдіратқожаевтың өмірбаянына сүйенсек, оның басшылығымен орындаушылық тәртіпке, кадрлардың жауапкершілігіне және ішкі бақылауға баса назар аударылады деп күтуге болады.
Сонымен қатар мына бағыттар ықтимал: прокуратурадағы және заңдылықты қадағалаудағы тәжірибе есебінен министрліктің бұйрықтары мен өкімдерін құқықтық сүйемелдеуді күшейту; түрлі ведомстволардағы басқару тәжірибесіне сүйене отырып, ішкі аудит пен есеп беру жүйелерін дамыту; ТЖМ мен ІІМ-де пысықталған тәжірибелер негізінде бақылау мен мониторингтің цифрлық құралдарын біріктіру.
Бұл ретте Қорғаныс министрі лауазымына ауысу Құдіратқожаев үшін жауапкершілік аясының айтарлықтай кеңеюін білдіреді: жекелеген құрылымдардағы қадағалау мен басқарудан шұғыл жоспарлау, жауынгерлік дайындық және материалдық-техникалық қамтамасыз ету мәселелерін қоса алғанда, әскери ведомствоны кешенді басқаруға көшу болып табылады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
