Алматыдағы Қаныш Сәтбаев атындағы №56 мектепке қатысты тараған видео қоғамда қызу талқыланды. Әсіресе карниздің бұзылған сәті түсірілген кадрлардан кейін «тарихи ғимаратты сүріп жатыр» деген пікірлер көбейді, деп жазады Ertenmedia.kz.
Алайда Құрылыс басқармасы бұл ақпаратқа дер кезінде түсініктеме беріп, мектепті бұзу жоспары жоқ екенін нақтылады. Қазіргі таңда нысанда сейсмикалық күшейту мен күрделі жөндеу жұмыстары жүргізіліп жатыр.
Алматы – сейсмикалық қауіпті аймақта орналасқан қала. Сондықтан мұнда кез келген ғимаратқа қойылатын талап жоғары. Әсіресе балалар оқитын мектептерге қауіпсіздік тұрғысынан ерекше назар аударылады.
№56 мектеп – тарихи маңызы бар, қала ортасында орналасқан нысан. Мұндай ғимараттарды сақтаудың екі жолы бар. Біріншісі – тек сыртқы келбетін сақтап, ішкі құрылымына қол тимеу. Екіншісі – конструкциясын толық күшейтіп, заманауи талапқа сай жаңарту. Қала екінші жолды таңдаған.
Сондықтан карниз, шатыр және парапет сияқты элементтердің уақытша алынуы – қалыпты құрылыс процесі. Бұл – бұзу емес, қайта қалпына келтіруге дайындық кезеңі. Құрылысшылардың айтуынша, барлық сәулеттік бөлшектер кейін бастапқы қалпына келтіріледі.
Жобаның басты ерекшелігі – тек ғимаратты жөндеу емес, оның ішкі мазмұнын толық жаңарту. Мектепте заманауи зертханалар, мультимедиялық сыныптар, кең кітапхана, жаңа асхана және көпфункционалды спорт кешені қарастырылған.
Бұл өзгерістер оқушылар үшін оқу ортасын түбегейлі жақсартады. Яғни ескі ғимарат сақталып қана қоймай, жаңа білім стандарттарына толық бейімделеді.
Әлеуметтік желідегі түсінбеушілікке жобаның алғашқы эскизі себеп болған. Онда карниз бен колонналар көрсетілмегендіктен, жұртшылық «бұзылады» деген қорытындыға келген. Кейін әкімдік эскизді жаңартып, бұл мәселеге ресми түсініктеме берді.
Бұл жағдай тағы бір мәселені көрсетті. Қоғамда ескі мектептерге қатысты екіұшты көзқарас бар: не толық бұзу, не өзгеріссіз қалдыру. Ал қазіргі тәсіл – тарихи келбетті сақтай отырып, ішкі құрылымды жаңарту.
Құрылыс басқармасының мәліметінше, жөндеу жұмыстары 2026 жылдың сәуірінде аяқталады. Бас мердігер – «Астана-Стройинвест» компаниясы. Уақытша қолайсыздық болғанымен, нәтижесінде Алматы тарихи мектептің сыртқы келбетін сақтап, оны толыққанды заманауи білім ордасына айналдыруға мүмкіндік алады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
