Әнші Алмас Кішкенбаевқа қатысты сот тағы шегерілді, алайда себебі әзірге белгісіз, — деп хабарлайды ErtenMedia.
«Сот өтті, бірақ іс қаралмады, басқа уақытқа кейінге қалдырылды. Процесс жабық болғандықтан, отырыс неге кейінге қалдырылғаны белгісіз», — деп мәлімдеген соттың баспасөз қызметі Tengrinews.kz-ке.
Бұған дейін танымал әншіге қатысты іс Алматы қаласының әкімшілік құқықбұзушылық жөніндегі мамандандырылған ауданаралық сотына келіп түскен болатын.
Алмас Кішкенбаев не үшін айыпталып отыр?
Әкімшілік кодекстің 434-бабының 1-бөлігіне сәйкес, “қоғамдық орындарда былапыт сөйлеу, адамдарға тиісу және айналасындағыларды сыйламау, қоғамдық тәртіп пен жеке тұлғалардың тыныштығын бұзу” ұсақ бұзақылыққа жатады. Заң бойынша мұндай әрекет үшін 20 айлық есептік көрсеткіш (шамамен 78 640 теңге) көлемінде айыппұл немесе 5-15 тәулік аралығында қамауға алу жазасы қарастырылған.
Айыптаудың мәні неде?
Бұған дейін желіде Алмас Кішкенбаевты полицияға әкеткені туралы ақпарат тараған еді. Ақпаратқа сүйенсек, оған “кәмелетке толмаған балаға тиісу” дерегі бойынша шағым түскен. Істің мән-жайын енді сот анықтайды.
Алмас Кішкенбаев кім?
Алмас Кішкенбаев – қазақстандық эстрада әншісі, 2000-жылдардың басында Superstar KZ жобасының алғашқы маусымында (2004 жылы) жеңіске жетіп, танымалдылыққа ие болған. Содан бері ол бірнеше ән жинақ пен жеке концерттік бағдарламалар ұсынған.
