Алматы қаласында есірткі қылмысына қарсы күрес күнделікті нақты әрекетке айналған. Жыл басынан бері қалада шамамен 600 есірткі қылмысы анықталды. Соның 260-тан астамы тікелей сату фактілеріне қатысты. Әрбір істің артында бір тағдыр, бір қауіп бар деген сөз. Осы істер бойынша 440-тан астам адам қылмыстық жауапкершілікке тартылды. Олардың ішінде 28 шетелдік азамат бар, деп жазады Ertenmedia.kz.
Қала полициясы қазір есірткінің тек көшедегі емес, экранның ар жағындағы жолдарын да бақылауға алған. Байланыссыз тарату, жасырын қоймалар, электронды төлемдер, криптовалюта бәрі назарда.
Алматы қалалық полиция департаментінің есірткі қылмысына қарсы іс-қимыл басқармасының бастығы Мұрат Жұмабаев осы бағыттағы жұмыстың қалай жүріп жатқанын ашық айтып отыр.
– Біз есірткі қылмысының барлық түрін тіркейміз. Қазір қылмыскерлер қолма-қол кездесуден қашады, қойманы бір жерге тастап кетеді, ақшаны электронды жолмен алады. Сол себепті жұмыс тәсілі де өзгерді, – дейді ол.
Есептік кезеңде 91 жасырын қойма қалдырып кетуші ұсталған. Бұл дегеніңіз ондаған ауданда есірткі таратудың жолы кесілді деген сөз.
Сонымен қатар синтетикалық есірткі дайындайтын екі зертхана анықталып, толықтай жойылды. Ол жерлерден тек заттың өзі ғана емес, қомақты сомаға бағаланатын жабдықтар мен прекурсорлар тәркіленді. Мұндай зертханалар бір күнде пайда болмайды. Артында қаржы, логистика, байланыс тұрады.
Полиция бұл жерде жалғыз қалған жоқ. Қаржы ұйымдарымен бірлескен жұмыс күшейтілді. Соның нәтижесінде 1,5 мыңнан астам банк картасы мен 1 мыңнан аса криптоәмиян бұғатталған.
Заңсыз айналымға қатысы бар қаржы операциялары тоқтатылды. Жалпы көлемі 68 миллион теңгеден асатын қаражаттың жолы кесілді. Бұл – есірткі саудасының қан тамырына соққы деген сөз. Кейде тұрғындар «бәрі ұсталып жатыр ма?» деп сұрайды. Бір полицейдің сөзі есте қалады.
– Біз бір күнде бәрін жоя алмаймыз. Бірақ әр ұсталған курьер, әр жабылған карта бір үйге кірмеген у, – дейді ол.
Алматы үлкен қала. Мұнда сұраныс та бар, соған қарай қылмыскерлердің айласы да көп. Бірақ қазіргі бағыт анық. Полиция тек көшеде патрульдеумен шектелмейді. Ақша қозғалысын, цифрлық ізді, байланыс тізбегін қатар тексереді.
Бұл жұмыстың сырт көзге көрінбейтін тұсы көп. Бір операцияның артында айлар бойы жиналған дерек, талдау, бақылау тұрады. Есірткі қылмысына қарсы күрес айқаймен емес, есеппен, дәлдікпен жүріп жатыр.
Қаладағы жағдайды өзгерту үшін тек ұстап қою аз. Қаржысын тоқтату, арнасын жабу, тарататын ортасын бұзу маңызды. Қазір Алматыда дәл осы бағытта нақты жұмыс жүргізіліп отыр.
