Алматы қаласы тарихында алғаш рет әлемдік деңгейдегі музыкалық топ Backstreet Boys сахнаға шығуға дайындалуда. Көпшілік асыға күткен концерттің билеттері әлдеқашан толық сатылып кеткен, енді қаланың басты стадионында өткен ғасырдың соңындағы поп-мәдениеттің тынысын қайта сезінуге мыңдаған жан жиналмақ. Мұндай шара тек музыкалық мереке ғана емес, сонымен бірге Алматының мәдени өміріндегі маңызды оқиғаға айналғалы тұр, – деп хабарлайды Ertenmedia.kz.
Ұйымдастырушылар көрермендерге басты ережелерді еске салып отыр. Стадион қақпасы 15:00-де ашылады, кіру тек QR-коды бар билет арқылы жүзеге асады.
Әсіресе жасөспірімдерге қойылған талап қатаң: фан-зонаға 16 жастан жоғары азаматтар ғана кіре алады, ал 12-16 жас аралығындағы балалар тек ата-аналарымен бірге отырғыш секторға жіберіледі. Бұл қауіпсіздікті қамтамасыз ету үшін жасалған қадам. Стадионнан бір шыққан соң қайта кіру мүмкін болмайтынын да ұйымдастырушылар нақтылап айтты.
Көрермендердің жеке заттары мұқият тексерілмек, ал тағам, сусын және өзге де тыйым салынған заттар кіргізілмейді. Қонақтардан тәртіпті сақтап, еріктілердің нұсқауларын орындау сұралады. Дресс-код та ерекше назарда: ұйымдастырушылар жанкүйерлерді 2000-жылдардың стилінде киінуге шақырады. Ол кезеңнің символына айналған карго-штандар, кең жейделер, жылтыр топтар, бандана мен түрлі түсті әшекейлер сахнаның атмосферасын толықтырып, нағыз ностальгияны сыйламақ.
Сондай-ақ, әр секторға жеке-жеке белгіленген қақпалар бар, сондықтан кіру сызбасын алдын ала қарап алған абзал. Бұл тек көрермендер ағынын реттеуге ғана емес, тәртіп пен қауіпсіздікті сақтауға да сеп болмақ.
Алматыдағы бұл үлкен шара қала тұрғындары мен қонақтары үшін бір сәтке болсын жастық шағын еске алуға, ұмытылмас әсер алуға мүмкіндік бермек. Backstreet Boys-тың Қазақстанға алғаш келуі музыкалық тарихымыздағы жаңа парақ, әрі мәдени туризм үшін де үлкен табыс.
