Биыл Алматыда ерекше қажеттілігі бар азаматтарға арналған мәдени өмір бір саты жоғарылай түсті десек болады. Соның бір дәлелі «Алатау» театры жанындағы демалыс бөлімінің жұмысы. Жыл ішінде олар шығармашыл қала тұрғындарын қолдау үшін 132 мәдени іс шара ұйымдастырған, деп жазады Ertenmedia.kz.
Бұл шаралар бір залдың ішінде ғана өткен жоқ. «Атамұра», «Армандастар», «Ән жүрек», «Дос» сияқты шығармашылық ұжымдар жыл бойы санаторийлерге, ардагерлер госпитальдарына барып, концерт қойды. Бір қарағанда қарапайым сапар сияқты, бірақ ондай жердегі адамға концерттің өзі көңіл көтеру ғана емес, қоғам назарынан тыс қалмағанын сездіретін белгі.
Зағип жандарға арналған мәдениет үйінде де жұмыс тоқтамаған. Мұнда мерейтойлық, ағартушылық бағыттағы кездесулер, концерттер, түрлі форматтағы бағдарламалар өткен. Соның ішінде көпшіліктің есінде қалғаны «Екі жұлдыз» ән фестивалі. Қазақстан, Қырғызстан және Өзбекстаннан келген 10 дуэт өнер көрсеткен. Үш елдің сахнада бір ырғаққа түсуі – мәдени байланыстың де, ортақ талғамның да барын көрсетті.
Жыл бойы қалада концерт, байқау, кино көрсетілімдері, шеберлік дәрістері ұйымдастырылып, түрлі үйірмелер мен студиялар жұмыс істеді. Яғни, мәдени орта тек мерекелік күндерде ғана емес, күнделікті өмірдің бір бөлігіне айналуға жақындады.
Негізгі оқиғалардың бірі «Жеңіс вальсі» фестивалі. Оған Қазақстанның 9 өңірінен келген ұжымдар қатысып, бір сахнада тәжірибе алмасты. Бұл фестивальдің мәні де қарапайым: әр өңірдің үні мен мектебі араласқанда, қатысушылардың мүмкіндігі кеңейеді.
Алматылық өнерпаздардың жетістігі тек қала ішінде қалмаған. Әлім Меңдібаев Минскіде өткен өнер фестивалінде бас жүлде алды. Ал Н.А. Жуковская Өзбекстандағы Азия чемпионатында жүлделі орындарға қол жеткізді. Мұндай нәтиже кездейсоқ келмейді. Тұрақты дайындық, дұрыс орта, әрі ең бастысы адамның қабілетін шектемейтін көзқарас керек.
Қысқасы, Алматы 2025 жылы ерекше қажеттілігі бар азаматтардың мәдени өмірін «бір реттік акция» деңгейінде қалдырмай, жүйелі бағытқа айналдыруға тырысты. Мұндай қадам қалаға да абырой, адамдарға да үміт береді.
