Алматыда ауаның ластануын азайту үшін қала орталығына ескі көліктердің кіруін шектейтін арнайы LEZ-аймақ енгізілуі мүмкін. Қалалық мәслихат заң жобасын әзірлеп жатыр.
Бұл ретте Almaty Air Initiative қоры тұрғындар арасында арнайы сауалнама жүргізіп, LEZ-аймаққа халықтың қалай қарайтынын анықтады, деп хабарлайды Ertenmedia.
Сауалнамаға 500 алматылық қатысқан. Оның ішінде 200-і жаяу жүргінші және қоғамдық көлік жолаушылары, 200-і көлік иелері, 100-і такси жүргізушілері.
Сауалнама қорытындысына сай, қала тұрғындарының жартысынан астамы (51%) LEZ-аймақтардың енгізілуін қолдаған. Қарсы шыққандардың үлесі небәрі 18% болса да, олар негізінен ескі көлік иелерінің арасынан табылған.
Көлік иелері арасынан жаңа көлік мінетіндер бұл бастаманы қолдап отыр 65%. Сондай-ақ, такси жүргізушілерінің 59%-ы, жаяу жүргіншілердің 52%-ы оң көзқарас білдірген.
«Әйелдер LEZ-аймақтарды ерлерге қарағанда белсендірек қолдаған. Әйелдердің басты уәжі – балалардың денсаулығы. Ерлер арасында бұл бастамаға қарсылық екі есе жоғары (әйелдерде 13%, ерлерде 21%). Дегенмен, отбасылы ерлер арасында бастамаға қолдау деңгейі сәл жоғарырақ (52%), бұл ер азаматтар үшін жақындарының денсаулығы маңызды екенін көрсетеді», – делінген зерттеуде.
Ескі көлік иелері бастамаға аса қатты қарсы: олардың тек 26%-ы LEZ-аймақтарды қолдаса, 39%-ы қарсы шыққан. Негізгі себеп әділетсіздік сезімі (66%) және қосымша шығыннан қорқу (35%).
Автокөлік иелерінің барлығын есепке алғанда қолдау көрсеткендер 44%-дан аспады, ал қарсы болғандар 27%.
Сауалнамаға қатысушылардың 88%-ы Алматыдағы ауаның сапасына алаңдайтынын айтқан. Әсіресе, баласы бар әйелдерде бұл көрсеткіш жоғарырақ 90%. Ерлер арасында мұндай айырмашылық аз байқалады: баласы барлардың 88%-ы, баласы жоқтардың 87%-ы ауаның сапасын проблема санайды.
Ауаның жағдайына әсіресе Медеу (92%), Әуезов (90%) және Түрксіб (90%) аудандарының тұрғындары наразы.
«Ауаның негізгі ластаушысы не?» деген сауалға респонденттердің жартысына жуығы автокөлікті көрсеткен. Атап айтқанда, 41%-ы жеңіл көлікті, 9%-ы жүк көлігін айыптаған.
Бірақ бұл мәселеде пікір бөлінді. Жаяу жүргіншілердің 45,5%-ы жеңіл көліктерді басты ластаушы санаса, қоғамдық көлік пайдаланушыларының 47%-ы да осы пікірде. Көлік иелері басқаша ойлайды. Олар ТЭЦ пен өндіріс орындарын (21%), құрылысты (19%) және жүк көліктерін (13%) негізгі ластаушы деп атайды.
Сауалнама барысында ескі көлік иелерінің 66%-ы өздерінің көлігі қоршаған ортаны ластамайтынын айтып, жаңа көліктерді айыптаған. Ал шын мәнінде олардың тек 21%-ы ғана көліктерінің ауаны ластайтынын мойындаған.
Осындай көзқарас жеке сектор тұрғындары арасында да байқалды. Олар ауаның ластануын өз үйлерінде көмір мен қатты отынды жағудан гөрі басқа факторлармен байланыстырған.
