Президент Тоқаевтың өкімімен Саят Исанов Қарулы күштердің Арнайы операциялар күштерінің қолбасшысы лауазымына тағайындалды, деп хабарлайды Ertenmedia.kz.
Ақорда таратқан ресми мәліметке сәйкес, жаңа қолбасшы бекітілген әскери міндеттерін атқаруға кірісті. Саят Исанов бұған дейін аталған құрылым қолбасшысының орынбасары қызметін атқарып, арнайы бөлімшелердің жауынгерлік даярлығы мен жедел іс-қимылдарына жетекшілік еткен офицер.
Қолбасшылықтағы ауыс-түйіс себебі
Арнайы операциялар күштеріндегі басшылық орын бұрынғы қолбасшы Айдос Мырзахметовтің өзге қызметке ауысуынан кейін босаған еді. Ол аталған құрылымды 2024 жылдың басынан бері басқарып келген болатын.
Каспий теңізіндегі қайғылы оқу-жаттығудан соң әскери ведомствода ауқымды кадрлық өзгерістер орын алып, Қорғаныс министрі Дәурен Қосанов қызметінен босатылды. Осыдан кейін Президент Тоқаев Айдос Мырзахметовті жаңа Қорғаныс министрі етіп тағайындаған болатын. Енді оның босаған орнына құрылымның тыныс-тіршілігімен жақсы таныс орынбасары жетекшілік ететін болды.
Арнайы операциялар күштерінің міндеті
Қарулы күштер құрамындағы аталған құрылым Мемлекет басшысының бастамасымен 2022 жылдың қаңтарында жасақталған. Негізгі мақсаты елдің қорғаныс қабілетін күшейту, гибридтік сипаттағы қатерлерге жедел тойтарыс беру және мемлекет қауіпсіздігін қамтамасыз етудегі арнайы тапсырмаларды орындау болып белгіленген.
Қолбасшылық құрамына кез келген күрделі жағдайда жедел әрекет етуге қауқарлы, заманауи ұрыс тәсілдерін меңгерген элиталық бөлімшелер енеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
