Құлсары қаласында ер адам бұрынғы жұбайын ол жұмыс істейтін емхананың ғимаратында өлтіріп кеткен, – деп хабарлайды Ertenmedia.kz.
Қайғылы оқиға 27 наурыз күні, түстен кейін болған. Бұрынғы күйеуі әйелге ол жұмыс кабинетінде жалғыз отырған кезде пышақпен шабуыл жасаған. Одан кейін оқиға орнынан бой тасалаған.
Қылмыстың куәгерлері марқұмның әріптестері болғанымен, оны аман алып қалу мүмкін болмады.
– Құлсары қаласында болған оқиға бойынша Жылыой ауданының полициясы Қылмыстық кодекстің «Адам өлтіру» бабымен іс қозғады. Кешенді тергеу амалдары басталды. Тергеу мүддесіне байланысты басқа ақпарат жариялауға жатпайды, – деп мәлімдеді облыстық полиция департаменті.
Қазіргі уақытта 33 жастағы күдікті ұсталды.
Марқұмның артында екі баласы қалды. Ол Құлсары маңындағы туған ауылында жерленеді.
Бұған дейін Қызылорда облысы Тасбөгет кентінде бір әйел полицияға арыз түсірген. Айтуынша, күйеуі оны ауруханада соққыға жығып, қабырғасын сындырған.
