Қазақстандағы балалар педиатриясының негізін қалаушы, академик Камал Ормантаев өмірден өтті, — деп хабарлайды ErtenMedia.
Қаралы хабарды Жарас Ормантаев жеткізді.
«Бүгін түнде ардақты әкем, Қазақстандағы балалар хирургиясының негізін қалаушы, академик Камал Ормантаев өмірден өтті», — деп жазды Жарас Ормантаев Facebook парақшасында.
Камал Ормантаев – Қазақстандағы балалар хирургиясы, педиатрия, травматология және анестезиология салаларының негізін қалаушылардың бірі. Ол 20 мыңға жуық ота жасап, медицинаға зор үлес қосты.
1936 жылы 11 қыркүйекте Қызылорда облысында дүниеге келген. 1953 жылы Алматы мемлекеттік медицина институтының педиатрия факультетіне оқуға түсіп, кейін балалар хирургиясы кафедрасының клиникалық резидентурасына қабылданды.
1961 жылы клиникалық резидентураны, 1965 жылы ауруханалық хирургия кафедрасының аспирантурасын аяқтап, кандидаттық диссертациясын қорғады. Еңбек жолын балалар хирургиясы кафедрасының ассистенті ретінде бастаған. 32 жасында Алматы медицина институтында балалар хирургиясы кафедрасын басқарды.
1968 жылдан 2012 жылға дейін осы кафедраның меңгерушісі қызметін атқарды. Камал Ормантаев – 320-дан аса ғылыми еңбектің авторы.
