BYD компаниясы нарыққа толық электрлі, қуатты әрі алыс қашықтыққа арналған жаңа Great Tang жол талғамайтын көлігін шығарды деп хабарлайды Ertenmedia.kz.
Great Tang моделінің алдын ала сатылымы сәуір айында Бейжің автошоуында басталады. Көлік Қытай нарығына төрт түрлі модификацияда шығады: артқы жетекті, толық жетекті, сондай-ақ түрлі өнімділік пен жүріс қашықтығы көрсеткіштеріне ие нұсқалары бар.
BYD компаниясының жаңа SUV-і Dynasty-D концептісінің сериялық нұсқасы саналады және өндірушінің кроссоверлер желісіндегі ең үлкен әрі технологиялық жағынан ең озық үлгісі.
Көліктің ұзындығы 5,3 метрден асады, ал дөңгелек базасы – 3,12 метр. Great Tang үш қатарлы, жеті орынды форматта жасалған. Мақсатты аудиториясы – кеңістік пен алыс сапарларға ыңғайлы, заманауи технологиясы бар көлікті іздейтін отбасылар.
Great Tang-тың ең қуатты әрі толық электрлі нұсқасы 950 шақырымға (590 миль) дейін жол жүре алады. Ол үшін көлік екінші буындағы Blade Battery аккумуляторымен жабдықталған. Батарея сыйымдылығы 130,15 кВт·сағ, жоғары қуатты жылдам зарядтауды қолдайды. Аталған артқы жетекті нұсқасы Қытай нарығындағы ең ұзақ жүретін электрокөліктер қатарына қосылды.
Екі электр қозғалтқышымен жабдықталған толық жетекті нұсқасы 585 кВт қуатқа ие, ол 0-ден 100 шақырым/сағатқа дейін 3,9 секундта жылдамдық алады. Бұл нұсқаның жүріс қашықтығы сәл қысқарып, шамамен 850 шақырымға (528 миль) жетеді.
Толық электрлі үлгілерден бөлек…
Great Tang моделінің гибридті нұсқалары да ұсынылады: DM-i және DM-p. DM-i нұсқасында 1,5 литрлік турбо қозғалтқышы мен қуаты 200 кВт электр моторы бар, бұл көлік электр қуатымен 343 шақырымға (213 миль) дейін жүреді және күнделікті қолданысқа бағытталған. Ал DM-p модификациясында жалпы қуаты 400 кВт-қа жететін қос мотор бар. Бұл модель қарқынды жылдамдық пен жүргізушінің динамикалық стиліне сай жасалған.
Great Tang моделі BYD-дың жалпы модельдік желісінде Denza премиум маркасымен бәсекелеспей, сонымен қатар негізгі орта сегменттің жоғары сатысына бағытталған. Осылайша, BYD компаниясы көліктің көлемі мен заманауи технологиясын, қолжетімді баға саясатын ұштастырып отыр.
Жаңа модельдің басты бәсекелесі ретінде Geely Galaxy M9 аталады, бұл гибридті SUV екі ай ішінде нарықта 11 мыңнан астам сатылған. Жалпы, бұл санатта отбасылық қолданысқа және ұзақ сапарға арналған, заманауи электрлік қуат жүйесі бар көліктерге деген сұраныс артып келеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
