Астанадағы бұрынғы Дариға Назарбаеваның саяжайы орналасқан жердің тағдыры белгілі болды. Бұл туралы елорда әкімі Жеңіс Қасымбек аудан тұрғындарымен кездесу барысында айтты, — деп хабарлайды ErtenMedia.
Кездесу барысында қала тұрғындары әкімнен саяжай бұзылғаннан кейінгі бос қалған аумаққа қатысты сұрақ қойды.
Бұрын бұл аумақ биік қоршаумен қоршалған болатын.
Әкімнің айтуынша, саяжай орнына қалалық инфрақұрылымға қажет жаңа нысандар бой көтереді.
“Қазір бұл аумақтағы құрылыс жұмыстары аяқталған соң шамамен 12 шақырымға созылатын ашық жағалау болады: яғни Ататүрік саябағынан бастап әрі қарай. Сондай-ақ, бұрынғы Қарттар үйі мен саяжай аумағы арасында мемлекеттік мектеп салынады”, – деді Жеңіс Қасымбек.
Әкім саяжайдан қалған қоршау толықтай алып тасталатынын жеткізді.
Еске салайық, бұған дейін Қазақстан ірі көлемдегі активтерді қайтарды. Олардың ішінде қонақүй кешені, әкімшілік ғимараттар, бизнестегі үлес, қымбат әшекейлер мен көліктер бар. Оның ішінде Дариға Назарбаеваға қатысы бар нысандар да болды.
