Павлодар облысы Денсаулық сақтау басқармасының тізгінін Иран Шаметеков ұстады. Иә, сол баяғы атышулы Шаметеков. Екі жыл бұрын Алматыда орталық клиникалық ауруханада болған ВИЧ дауына қатысты көпшілік есінде қалған еді. Сол жолы үш бірдей пациент инвазивті процедура кезінде ВИЧ инфекциясын жұқтырған. Аурухананың бас дәрігері Нариман Табынбаев қызметінен қуылып, басқарма басшысы Шаметеков аман қалған еді. Тіпті, артынша Денсаулық сақтау министрлігінде қызметін жалғастырғанын да білеміз.
Жалпы, Шаметековтің мансап жолы – дау-шардың шежіресі іспеттес. Ол 2020 жылы карантин талаптарын бұзғаны үшін айыппұл төлеген болатын. Бұдан басқа Қызылорда облысында болған бюджет қаржысын жымқыруға қатысты тергеу ісінде аты аталғаны есімізде.
Алматыда басшылық еткен тұста қызметкерлерден сыйақы талап етті деген әңгіме де тарағанын ұмыта қойған жоқпыз. Бірақ бұл айтылған айыптардың ешқайсы ресми түрде дәлелденбеген, бірақ қоғамның көкейінде күмән қалғаны жасырын емес.
Әрине, Иран Шаметеков – жай ғана тәжірибесіз шенеунік емес. Оның медицина, заң және бизнес салаларында үш бірдей білімі бар. Тіпті PhD дәрежесі де бар. Ол бұған дейін Астанадағы медициналық және фармацевтикалық бақылау департаментін басқарды.
Ең бастысы Павлодар облысының әкімі Асаин Байханов бұл тағайындауды мақұлдады. Бұған қарап, жоғары жақ үшін кадрдың беделі емес, байланысы маңыздырақ па деген ой келеді.
Павлодар жұртшылығы енді осы жаңа басшының ісін күтіп отыр. Денсаулық сақтау – жай ғана кабинеттегі қағаз емес, бұл – халықтың амандығы, бұл – әрбір баланың, әрбір ананың, әрбір қарияның тағдыры. Бұл – сенім мәселесі. Ал сенім бір рет жоғалса, оны қалпына келтіру – бір ғана бұйрықпен шешілмейді.
