Франция билігі ел аумағында өтетін жаппай шерулер қарсаңында қауіпсіздік шараларын барынша күшейтіп, көшелерге 70 мың полиция қызметкері мен жандармды жұмылдырды, деп хабарлайды Ertenmedia.kz.
Тәртіп сақшыларының саны 17 қазандағы митингілерге қарағанда 10 мың адамға арттырылды. Өткен аптадағы демонстрацияларға рекордтық деңгейде халық шығып, акциялар соңы ірі тәртіпсіздіктер мен қиратуларға ұласқан еді. Сол кезде 2400-ге жуық наразылық білдіруші ұсталып, кейінгі жүргізілген тергеулер барысында тағы 500-ге жуық адам қамауға алынған болатын.
Көшелерге бронетехника мен суатқыштар шығарылды
Қоғамдық тәртіпті бақылауға кәдімгі полициямен қатар арнайы жасақтар да қосылды. Олар негізінен мемлекеттік мекемелер мен қоғамдық ғимараттарды күзетуге жауапты болады. Сонымен қатар көшелерді патрульдеуге атты және кинологиялық бөлімшелер, тікұшақтар мен дрондар жұмылдырылды.
Қауіпсіздік күштерінің қарамағында броньды техникалар мен суатқыштар дайын тұр. Әлеуметтік желілерде радикалды солшыл қозғалыстардың күш қолдануға және нысандарды қиратып-тонауға шақырған белсенді үндеулері тараған соң, билік осындай қатаң шараға көшті.
«Вандалдар мен тонаушыларға еш кешірім жасалмайды»
Францияның ішкі істер министрі Лоран Нуньес қауіпсіздікті қамтамасыз етудің кеңейтілген жоспарын таныстырып, тәртіп бұзғандардың жауапқа тартылатынын нақтылады.
«Операциялар тұтқындауды жедел жүргізу және зорлық-зомбылық әрекеттерінің алдын алу мақсатында үлкен табандылықпен жүзеге асады. Біз вандалдар мен тонаушыларға еш кешірім жасамаймыз», – деп ескертті Лоран Нуньес.
Заңсыз әрекеттерге жедел тосқауыл қою үшін әр аймақтық ведомствода жергілікті прокуратурамен бірлескен арнайы жедел бөлімшелер құрылды. Бұл топтар ұсталғандарды сол мезетте рәсімдеп, қамауға алу шараларын тездетуге бағытталған.
Коменданттық сағат және қорғанған сауда орындары
Елдің бірқатар қалаларында және Париждің басты орындарының бірі — Республика алаңында коменданттық сағат режимі әлі де күшінде сақталып тұр. Жергілікті тұрғындар мен кәсіпкерлер де жаңа қақтығыстардан қауіптеніп отыр.
Жаңа толқулар алдында Париждің орталық көшелері мен Елисей алқабындағы сауда орындары сақтық шарасын күшейтті. Көптеген дүкен мен дәмхана иелері ғимарат витриналарын ағаш тақталармен және темір қалқандармен бекітіп, тәртіпсіздікке алдын ала баррикадаланып жатыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
