2005 жылы Google Пало-Альтода орналасқан шағын ғана Android Inc. стартапын шамамен 50 миллион долларға сатып алды, деп жазады Ertenmedia.kz.
Ол кезде компанияны Энди Рубин, Рич Майнер, Ник Сирс және Крис Уайт құрған еді. Алғашқы ойлары сандық камераларға арналған операциялық жүйе жасау болатын. Алайда 2004 жылы бағыт өзгерді. Команда мобильді телефон нарығына бет бұрып, құрылғы өндірушілеріне сол кезеңде бар платформалардан икемдірек, ақылдырақ бағдарламалық негіз ұсынуды көздеді.
Сол тұста технология әлемінің басым бөлігі бұл мәмілеге айрықша мән бере қоймаған. Смартфон дәуірі әлі толық басталмаған еді.
Кейінгі оқиға технология тарихындағы ең сәтті шешімдердің біріне айналды. Android коммерциялық нарыққа 2008 жылы шықты. Яғни Apple iPhone-ды таныстырғаннан кейін бір жыл өткен соң іске қосылды.
Бірақ Android-тің басты артықшылығы бір ғана құрылғыға байланбауында болды. Google жүйені пайдалануға дайын кез келген өндірушіге ашық ұсынды. Соның арқасында Android қымбат флагманнан бастап, бағасы өте арзан модельдерге дейін мыңдаған түрлі құрылғыға тарады.
Осы қадам Google-ға бірден ауқымды артықшылық берді. Компания өз операциялық жүйесін тек премиум сегментке емес, әлемдік нарықтың барлық деңгейіне кіргізді. Бір елде мың доллардан асатын смартфон сатылса, енді бір нарықта отыз доллар шамасындағы құрылғы жүрді. Бірақ екеуінің ішінде де Google-дың экожүйесі жұмыс істей бастады. Міне, негізгі стратегиялық ұтыс осында жатты.
Контекст
Қазір Android әлемдегі смартфондардың шамамен 73 пайызына орнатылған платформа саналады. Яғни миллиардтаған адамның қалтасында Google-дың тікелей қатысы бар жүйе жүр. Тек операциялық жүйе ретінде емес, ол Google Search, Google Maps, Gmail, YouTube және басқа да сервистерге баратын ең үлкен арнаға айналды. Қарапайым тілмен айтқанда, Android Google-дың қолындағы ең қуатты тарату құралы болды.
Көпшілік Android-ті жай ғана телефон жүйесі деп қабылдайды. Негізінде ол Google-дың ұзақмерзімді стратегиялық шешімі еді. Компания іздеу жүйесінен бөлек, адамның күнделікті өміріне тікелей енетін мобильді кеңістікке ерте кіріп алды. Соның арқасында Google интернеттегі ықпалын телефон экранына көшірді. Кейін әлемдік цифрлық бәсеке дәл осы мобильді кеңістікте жүрді.
Сол себепті 50 миллион долларлық мәміле бүгінгі өлшеммен қарағанда аса ұтымды инвестицияның бірі болып көрінеді. Ол кезде елеусіз көрінген сатып алу кейін жаһандық технологиялық тепе-теңдікті өзгерткен шешімге айналды. Android Google-ға жай нарық емес, миллиардтаған аудиторияға күн сайын тікелей шығатын жол ашты.
Жол апаты кезінде сыналатын краш-манекендер кейде өздері отырған көліктен де қымбат тұратынын білесіз бе?
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
