Қазақстанда квазимемлекеттік компаниялардың сатып алуларына бақылау күшейтілді, — деп хабарлайды ErtenMedia.
ҚР Қаржы министрлігіне тауарларды, жұмыстар мен көрсетілетін қызметтерді сатып алу кезінде квазимемлекеттік сектор субъектілері жасаған әкімшілік құқықбұзушылық туралы істерді қарау құзыреті берілді.
Жоғары аудиторлық палатаның ұсынымы бойынша заңнамаға түзетулер енгізілді.
Әкімшілік құқықбұзушылық туралы кодексте тиісті норма болмауы квазимемлекеттік сектор субъектілерін заңбұзушылықтары үшін әкімшілік жауапқа тартуға мүмкіндік бермеді. ҚР Үкіметіне заңнамалық коллизияларды жою мақсатында Әкімшілік құқықбұзушылық туралы кодекске өзгерістер мен толықтырулар енгізу ұсынылды. Қаржы министрлігіне тауарларды, жұмыстарды және көрсетілетін қызметтерді (ӘҚтК-нің 207-1-бабы бойынша) сатып алу кезінде квазимемлекеттік сектор субъектілері жасаған әкімшілік құқықбұзушылық туралы істерді қарау құзыретін бекіту мәселесі көтерілді.
2025 жылғы 10 қаңтарда Қазақстан Республикасының «Әкімшілік құқық бұзушылық туралы» Кодексінің 722-бабының бірінші бөлігіне түзетулер енгізілді.
Нәтижесінде Қаржы министрлігі квазимемлекеттік компаниялардың сатып алуларындағы заңбұзушылықтарға жедел ден қойып, өз тергеулерінің қорытындысы бойынша жауапқа тартуға мүмкіндік алды. Сатып алу қағидаларын бұзғаны үшін әкімшілік жауапкершілік тәуекелін түсіну квазимемлекеттік сектор субъектілерін нормаларды мұқият сақтауға ынталандырып, жалпы сатып алу тәртібін арттырады.
Бұл ретте анықталған заңбұзушылықтарды талдау Қаржы министрлігіне жүйелі проблемаларды анықтауға және сатып алу процестерін одан әрі жетілдіру үшін нормативтік-құқықтық базаға өзгерістер енгізуге мүмкіндік береді.
2022 жылғы 1 ақпанда Мемлекет басшысы Қасым-Жомарт Тоқаев сыбайлас жемқорлыққа қарсы іс-қимыл мәселелері жөніндегі кеңес барысында барлық мемлекеттік сатып алу жүйесін және квазимемлекеттік сектордағы сатып алуды қайта қарау туралы тапсырма берген болатын.