Қазақстан Қарулы Күштеріндегі ең бойшаң сарбаз Маңғыстау облысындағы теңіз жаяу әскерлері бригадасында қызмет атқарып жүр. Оның бойы 2 метр 9 сантиметр. Мұндай биіктік әскердегі саптық жүйеге ғана емес, рух биігіне де лайық екені сөзсіз, деп жазады Ertenmedia.kz.
Әлішер Назымбек Ақмола облысының Жарқайың ауданындағы Далабай ауылында дүниеге келген. Үлкен әулеттің ұлы алты баланың бірі. Анасы жағынан атасына тартқан биік дене бітімі бала кезінен-ақ оның ерекшелігін танытқан.
Мектептегі суреттерде қатарластарының үстінен «асқақ қарап тұрған» бала бүгінде ел қорғап жүрген жауынгер. Әскерге шақырылғанға дейін ол Көкшетау жоғары көпсалалы азаматтық қорғау колледжін «Өрт қауіпсіздігі» мамандығы бойынша тәмамдаған. Өрт сөндіруші мен сарбаздың табиғаты ұқсас: екеуі де қауіпті жерге алғаш болып кіреді, өзінен бұрын өзгенің амандығын ойлайды.
Жастайынан спортқа жақын болған. Волейбол мен кикбокстан жарыстарға қатысып, колледждің атынан республикалық деңгейде бақ сынаған. Спорт тек дене шынықтыру емес, мінез мектебі екенін дәлелдепті. Сол мінез оны теңіз жаяу әскеріне алып келді. Себебі бұл бөлімге іріктеу қатаң, тек төзімді әрі тәртіпке берік азаматтар ғана өтеді.
Әлішердің айтуынша, ол бала күнінен теңіз жаяу әскерінде қызмет етуді армандаған. «Іріктеуден өту оңай болмағанымен, спорт маған сенімділік берді. Әскери борышымды өтеп болған соң офицер болғым келеді. Ал Құрмет қарауыл ротасына қосылу – балалық арманымның жалғасы. Бойым мен тәртібімді ескерсе, мүмкіндігім бар деп сенемін», – дейді ол.
Теңіз жаяу әскерлері әскердің ең шыңдалған тобы. Бұл сарбаздар жағада ғана емес, су үстінде де, қиын табиғи жағдайда да күресуге бейімделген. Ондағы әрбір жауынгердің бойында қайсарлық пен төзім қатар ұштасқан. Ертеректе бұл бөлімде Денис Балюк (2 метр 8 см) пен Азат Мұхамеджанов (2 метр 4 см) сияқты биік сарбаздар қызмет еткен. Енді рекорд Алишердің еншісінде.
Бірақ әңгіме бойда емес, ойда. Әскер үшін ең маңыздысы тәртіп пен адалдық. Алишердің биіктігі тек физикалық тұрғыда емес, адамдық тұрғыда да көрініс табуда. Командирлері оны жауапкершілігі жоғары, сабырлы, бір сөзге берік сарбаз ретінде сипаттайды. Әрбір тапсырманы ұқыппен орындайды, ал жаттығу кезінде өзгелерге дем беріп, үлгі көрсетеді. Мұндай қасиет сарбаздың тек дене тұрқынан емес, рухани болмысынан танылады.
Маңғыстаудың желі мен теңіз иісі сіңген базадағы күндер оңай емес. Қатты ыстық, ауыр жүктемелер, ұдайы дайындық сарбаздың шыдамын сынайды. Бірақ дәл осындай сынақтар жігітті шыңдайды. Алишер үшін әр таң – жаңа міндет, әр жаттығу – арманына бір қадам жақындау. Оның офицер болуға деген талпынысы тек жеке мақсат емес, елге қызмет ету ниетінің айғағы.
Мұндай сарбаздар қазақ жастарының жаңа буынының бейнесін көрсетеді. Ел тыныштығын күзетіп жүрген жастардың арасында Әлішер сияқты табанды, спортпен шыңдалған, болашағына сенімді азаматтардың бар болуы – елдің ертеңіне сенім ұялатады. Қазақтың биік ұлдары биік мақсатпен ғана ерекшеленеді.
