Массачусетс технологиялық институты (MIT) мен Жапонияның RIKEN зерттеу институтының инженерлері бүгілуге, созылуға және бұралуға төзімді, өз пішінін үш өлшемді кеңістікте дәл көрсете алатын жұмсақ сенсор ойлап тапты. Бірегей технология болашақта қозғалысты бақылайтын «ақылды киімдер» жасауға, роботтарды қашықтан басқаруға және медициналық оңалту шараларының сапасын арттыруға жол ашады, деп хабарлайды Ertenmedia.kz.
Резеңке жарық өткізгіштер және жарықтың шағылысуы
Құрылғының негізі кремний-органикалық матаға кіріктірілген, қара резеңке қабықпен қапталған созылғыш каучук жарық өткізгіштерден тұрады. Ғалымдар оптикалық талшықтың бір қырын әдейі кедір-бұдыр етіп жасаған. Соның арқасында сенсор иілген кезде жарық біркелкі таралмай шашырап, деформацияның нақты қай бағытта жүріп жатқанын дәл анықтауға мүмкіндік береді.
Күрделі қозғалыстар мен пішіндерді қатесіз тіркеу үшін талшықтардың мата бетіне ирек (зигзаг) түрінде орналастырылуы ең тиімді тәсіл болып шықты.
Жоғары дәлдік және үзілуге төзімділік
Жүйе жарық диодтары мен арнайы датчиктер арқылы жарық ағынының өзгеруін қадағалап, сигналдарды сыртқы тақтаға жолдайды. Арнайы әзірленген алгоритм нақты уақыт режимінде матаның сандық 3D моделін лезде құрастырып отырады.
Сынақ барысында жаңа өнертабыстың қателік көрсеткіші 0,4 сантиметрден аспады. Ал бүгінде кең қолданылатын дәстүрлі қатты сенсорларда мұндай ауытқу 1–2 сантиметрге дейін жететін.
Әзірлеменің басты артықшылығы – оның механикалық зақымға төзімділігінде. Сенсордың өткізгіш талшықтарының бір бөлігі кесіліп немесе үзіліп қалған күннің өзінде, сандық көшірме өзінің бастапқы дәлдігін толық сақтап қалады.
Медициналық бандаждар мен келешек жоспар
Ғалымдар алдағы уақытта оптикалық талшықтардың қалыңдығын қазіргі 1 миллиметрден ондаған микрометрге дейін жұқартуды көздеп отыр.
Мұндай жаңашылдық датчиктерді емдік бандаждар мен таңғыштардың матасына тікелей енгізуге мүмкіндік береді. Нәтижесінде дәрігерлер буын жарақаттарынан кейін оңалтудан өтіп жатқан науқастардың қозғалысын, буынның бүгілу дәрежесін қашықтан жіті бақылай алады. Сондай-ақ бұл технология виртуалды шындық құрылғылары мен роботтарды адам қимылымен басқару саласында кеңінен қолданысқа енбек.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
