Құрықтың төскейінде жастарға арнап жаңа үй ашылды. Үй болғанда ішіне үміт кіргізген, есігінен ертең кірген, қабырғасынан сенім сезілетін орын. Ауылдың бір шетінен көз тартқан, жаңа бояуы кеппеген сол нысанға жұрт таңғы салқынмен жиналды. Көк лента, жарқыраған ғимарат, үстіндегі маңдайшада жазулы «Қарақия аудандық жастар ресурстық орталығы».
Маңғыстау облысы әкімі әкім де келіпті. Нұрдәулет Қилыбай бір топ ел ағаларымен бірге Құрық көшесімен кідірмей жетіп, елмен амандасты. Үйдің ішіне кірмес бұрын аз-кем тоқтап, жастармен тілдесті.
– Жастар елдің болашағы. Оларға сенім арту біз үшін тек сөз емес, міндет, – деді әкім микрофонды алып. – Мемлекет басшысы Қасым-Жомарт Кемелұлының бастамасымен жастар саясатының жаңа дәуірі басталды. Бұл орталық – соның жарқын бір дәлелі.
Жиналған жұрт қошемет білдіріп, қол соқты. Ардагерлер ақ батасын беріп, жастар ішке ентелей кіріп, әр бөлмені бір шолып жүр. Ғимараттың жалпы аумағы 724 шаршы метрден асады. Есік ашсаң кеңес беру бөлмесі, тағы бір есік ашсаң коворкинг аймағы. «Open space» алаңы да бар. Ең артқы жақта шығармашылық студия орналасыпты, бір бұрышта 3х3 стритбол алаңы да көзге жылы ұрып тұр.
– Оу, мынау нағыз еркін ойлауға арналған жер екен ғой, – деді ауыл жігіті Еркін.
– Сурет салып, бейне түсіріп, TikTok та жасап жіберуге болады, – деп қосылды Айсұлу есімді қыз, телефон камерасын бір шолып.
Ауыл қариясы Темірбай ақсақал орнынан тұрып:
– Қаладан кем емес екен, жастардың бас қосатын, сөйлесетін, жоба құратын жері осы болса, жарқырайды, шырағым, – деді жанындағы әкімге қарап.
Әкім бас изеді. Ішкі жылы сөзге риза болған кейіпте.
– Бүгінде Қарақия ауданында 14 пен 35 жас аралығында 11 463 жас бар. Бұл халықтың 31 пайызы. Сол жастардың бірде-бірі тыс қалмауы керек. Бұл орталық соған жауап береді, – деді ол.
Ғимарат сыртында балалар алаңы да бар, волонтерлар штабы да бөлінген. Демалыс орындары да ойластырылған. Яғни, тек кеңес алып, ақпарат жинау емес, тынығып, ой бөлісіп, бірігіп әрекет ететін орта қалыптастыру көзделген.
Орталықтың ашылу салтанатында жастар шағын көрме ұйымдастырып, волонтерлар өз жобаларын таныстырды. Ертеңгі көшбасшы болғысы келетін балалардың көзі оттай жанып тұрды. Бірі робот құрастырғысы келеді, бірі туризммен айналысамын дейді.
– Бәрі бастамадан басталады, – деді аудан белсендісі Маржан. – Бұрын ондай бастама айтсаң күлкіге қалатын едік, енді осы орталық арқылы нақты тірлікке көшуге мүмкіндік туып тұр.
Қазір ауыл өзгеріп келеді. Құрықтың кешегісі мен ертеңін жалғап тұрған бүгінгінің бір белгісі осы орталық. Енді оның іші бос тұрмаса болғаны. Ең бастысы, шын көңілмен ашылған жерде шынайы тірлік басталады.
