Қарағанды облысының құрылыс және сәулет басқармасы құны 20,5 миллион теңге тұратын қымбат қызметтік көлік сатып алғаны туралы ақпарат тарады, — деп хабарлайды ErtenMedia «Әшкере» арнасына сілтеп.
Мемсатып алу сайтындағы дерекке қарағанда, көлік Нұрлан Смағұловқа тиесілі «Астана Моторс» компаниясының Қарағанды филиалынан алынған.
Техникалық сипаттама бойынша темір тұлпар сұр түсті, жылы жап-жаңа, қозғалтқыш көлемі 2,5 GDI, D-классының санатына жатады.
Мемлекеттік сатып алу туралы хабарландыру 18 ақпанда жарияланып, екі күннен кейін тендерге ешкім қатыспағандықтан, сатып алу бір көзден жүзеге асырылған.
Айта кетелік, өткен айда ғана президент Тоқаев Үкімет пен оған бағынышты органдарға бюджет қаражатын қатаң үнемдеу керек екенін ескертіп, «көрпеге қарай көсілуге» шақырған.
Жуырда желіде Алматы әкімдігіне қатысты да осындай даулы мәлімет жарияланды. Алматыда Н.Сац атындағы орыс мемлекеттік академиялық балалар мен жасөспірімдер театрының ғимаратын реконструкциялау жұмыстары басталмақ. Қала әкімдігі мәліметінше, реконструкциялау жобасы мемлекеттік сараптамадан өткен, құрылыс жұмыстарын жүргізетін мердігер ұйымды анықтау үшін байқау да жарияланған.
Жобаны жүзеге асыруға 21,7 млрд теңге бөлінген.
