Қарағандыда алғаш рет лизинг жүйесіне арналған ірі бизнес-форум – Leasing Day 2025 өтті. Бұл шара еліміздің қаржы нарығындағы жаңа бағыттардың бірі – коммерциялық лизингтің нақты мүмкіндіктерін көрсетуге арналған. Форум барысында Қарағанды кәсіпкері Қайрат Құрымбаевтың тәжірибесі ерекше мысал ретінде талқыланды. Ол дәстүрлі несиеге жүгінбей, жаңа бизнес нысанын лизинг арқылы рәсімдеп, Қазақстанда коммерциялық жылжымайтын мүлікті осылай алған алғашқы кәсіпкер атанды. Оның шешімі елдің қаржы жүйесінде кәсіпкерлік мәдениеттің жаңа сатыға көтеріліп келе жатқанын көрсетті, деп хабарлайды Ertenmedia.kz.
Кәсіпкердің айтуынша, бастапқыда жаңа тәсілді таңдауға аздап күмән болғанымен, нәтижесінде лизингтің тиімділігін іс жүзінде сезінген. «Мен жаңашылдыққа әрдайым ашықпын. Лизинг ұсынған кезде тәуекелге бардым. Бірінші тәжірибе болған соң рәсімдеу аздап ұзаққа созылды, бірақ есептеп қарасам, несиеден әлдеқайда ұтымды болды. Ең бастысы – кепіл сұрамайды және бизнесіңнің ауқымын кеңейтуге мүмкіндік береді», – дейді ол.
Форумға 300-ге жуық кәсіпкер, мемлекеттік органдар мен қаржы ұйымдарының өкілдері қатысты. Мұнда басты мақсат – лизингті шағын және орта бизнеске жаңа тыныс беретін құрал ретінде таныстыру болды. Қарағанды облысы әкімінің орынбасары Ораз Тәуірбековтің айтуынша, лизинг – экономиканың тірегі саналатын кәсіпкерлікке серпін беретін жаңа бағыт. «Облыстағы әрбір үшінші жұмыс орны бизнес саласына тиесілі. Сол себепті біз кәсіпкерлерге жаңа құралдар мен тиімді шешімдер ұсыну арқылы оларды қолдауға басымдық береміз. Мұндай алаңдар серіктестікке жол ашады, жаңа жобаларды іске қосуға мүмкіндік береді», – деді ол.
Бүгінде Қарағанды облысында 100 мыңнан астам шағын және орта бизнес субъектісі тіркелген, олардың қатарында 235 мыңнан астам адам еңбек етеді. Аймақ экономикасының өсуіне кәсіпкерлердің үлесі айтарлықтай жоғары. Биылдың өзінде «Даму» қоры арқылы 600 миллион теңгеден астам сомаға өңірлік жобалар қаржыландырылған. Ал енді лизинг жүйесінің дамуы бұл көрсеткішті еселей түсуі мүмкін.
Облыстық кәсіпкерлік басқармасы өкілдерінің айтуынша, лизингтің басты артықшылығы – бизнеске кепілсіз және артық несие жүктемесінсіз даму жолын ұсынуы. Бұрын лизинг тек өндірістік техника мен көліктерге қатысты болса, қазір ол жылжымайтын мүлікті де қамтиды. «Бастысы – кәсіпкерлер осы құралдың нақты пайдасын түсінуі керек. Ол салықтық жүктемені азайтып, айналымдағы қаражатты сақтауға мүмкіндік береді», – деді басқарма басшысының орынбасары Расул Қасенхан.
«Банк ЦентрКредит» өкілі Нұрлан Шегебаев та форумда сөз сөйлеп, қазіргі нарық икемді шешімдерді қажет ететінін айтты. «Бұрын лизинг тек теорияда айтылатын. Енді ол нақты тәжірибе ретінде бизнеске келіп отыр. Кәсіпкерлер мен жабдық жеткізушілерге осындай қаржы тетіктері ауадай қажет», – деді ол.
Форум аясында арнайы көрме ұйымдастырылып, кәсіпкерлер жабдық өндірушілермен, банктермен, салық саласының мамандарымен және «Даму» қорымен бетпе-бет кеңес алу мүмкіндігіне ие болды. Сарапшылар лизингтің салықтық артықшылықтарына да назар аударды: кәсіпкерлер қосылған құн салығынан босатылады, ал негізгі құралдарға жеделдетілген амортизация әдісін қолдана алады.
Leasing Day 2025 бизнеске жаңа тыныс берді. Қарағандылық кәсіпкерлер үшін бұл форум тек тәжірибе алмасу алаңы ғана емес, қаржылық еркіндікке бастайтын жаңа баспалдақ болды. Қайрат Құрымбаевтың мысалы көрсеткендей, егер кәсіпкер батыл қадамға барса, мемлекет пен қаржы институттары да оны қолдауға дайын. Лизинг жүйесі енді шағын және орта бизнестің дамуындағы жаңа дәуірдің бастауы болмақ.
