Қазақстанда кәсіпкерлер үшін қолайлы салық режимін өзгертуге берілген өтпелі кезең ресми түрде аяқталды. Мемлекеттік кірістер комитеті ауқымды реформаның қорытындысын шығарды деп хабарлайды Ertenmedia.kz.
Жеңілдетілген салық режимі кәсіпкерлер арасында ең танымал бағыт болып қалды. 1,2 миллионнан астам бизнес субъектісі жаңартылған оңайлатылған декларацияны таңдады.
Жаңа режим бойынша жылдық табысы 600 мың АЕК-ке дейін (шамамен 2,6 млрд теңге) шағын және орта бизнес субъектілері жұмыс істей алады. Бұл жүйенің басты ерекшелігі жалдамалы қызметкерлер саны бойынша ешқандай шектеу жоқ.
Салық жүктемесі де айтарлықтай төмендеді
Корпоративтік және жеке табыс салығының бірыңғай ставкасы небәрі 4%-ды құрайды (мәслихаттар бұл көрсеткішті екі есе төмендетуге құқылы). Бұған қоса, бизнестің осы санаты ҚҚС төлеуден толығымен босатылып, декларация жылына екі-ақ рет тапсырылады.
Сонымен қатар реформа нәтижесінде бұрын көлеңкеде болған 265 мыңнан астам адам заңды түрде ресми тіркелді. Қазір өзін-өзі жұмыспен қамтушылардың саны 346 мыңға жетті.
Өзін-өзі жұмыспен қамтыған азаматтарға да ерекше жағдайлар жасалған:
- жеке кәсіпкер ретінде тіркелу міндеттелмейді;
- жеке табыс салығынан босатылған;
- айлық табысының небәрі 4%-ын ғана бірыңғай төлем ретінде төлейді. Осы төлемге зейнетақы жарнасы, әлеуметтік сақтандыру және міндетті медициналық сақтандыру жарнасы кіреді.
Аталған режим ай сайынғы табысы 1,3 млн теңгеден аспайтын, ешкімді жалдамай жұмыс істейтін 40 түрлі қызмет түріне қолжетімді. Оған қоса, мобильді платформалар мен қосымшалар арқылы жұмыс істейтіндер де осы режимнің артықшылықтарын пайдалана алады.
Осылайша, Қазақстандағы салық реформасы шағын кәсіпкерлер мен өзін-өзі жұмыспен қамтыған азаматтар үшін бизнесті заңды түрде әрі тиімді жүргізудің жаңа кезеңін ашты.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
