Eurasian Resources Group экс-СЕО-сы Бенедикт Соботканың бұрынғы бірінші орынбасары Алдияр Қазтаев өзінің Piccolino яхтасын сатты. Мәміле 4,95 млн еуроға немесе 2,4 млрд теңгеге бағаланып отыр. Бұл бизнесменнің 2017 жылы кеме үшін төлеген қаржысынан бір жарым есе аз. Сатылымнан кейін Қазтаевтың яхтасы Alein деген жаңа атауға ие болды және енді оны кез келген адам аптасына 75 мың еуроға жалға ала алады. Бұл ERG-дің алғашқы акционерлерімен байланысы бар адамдардың биыл сатқан үшінші яхтасы болды. Александр Машкевич пен Әлижан Ибрагимовтың мұрагерлері де осыған ұқсас әрекет еткен еді, деп хабарлайды Ertenmedia.kz.
«Малышканың» техникалық мүмкіндіктері
Италиялық Sanlorenzo кеме верфі Piccolino (итальян тілінен аударғанда «Малышка») яхтасын тапсырыс берушілерге 2017 жылдың маусымында тапсырды. Атауына қарамастан, кеменің көлемі айтарлықтай үлкен болып шықты — оның ұзындығы 29 метрден астам, ені шамамен жеті метр. Ол қонақтарға арналған төрт каютамен және экипажға арналған екі каютамен жабдықталған әрі бортына сегіз жолаушы қабылдай алады. Бұл модельдің басты ерекшелігі — жылдамдығы. Қуаты 2200 ат күшіне тең екі қозғалтқыштың арқасында ол 29 түйінге дейін (сағатына 54 шақырымға жуық) жылдамдық алады, ал саяхат үшін неғұрлым қолайлы круиздік жылдамдығы 26 түйінді құрайды.
Офшорлық компаниялар және жалға беру
Яхта Алдияр Қазтаевтың атына тікелей емес, оның ата-анасы Аслан Қазтаев пен Ғалия Сарғасқаеваға тиесілі Piccolino Ltd және Piccolino Tender Ltd мальтиялық әрі британдық компаниялары арқылы рәсімделген болатын. Мальталық компанияның есептілігіне қарағанда, яхтаға жыл сайынғы қызмет көрсету отбасына 400–900 мың еуроға түскен. Сол есептіліктен Piccolino оларға 8 млн еуроға шыққаны анықталды. Теңіз тізілімінің деректеріне сәйкес, кеменің жаңа иесі грекиялық EKKA Yachts компаниясы болды. Ол кеменің атауын ғана емес, Қазтаевтар отбасы пайдаланған Мальта туын да грек туына ауыстырды. Қазіргі таңда оны аптасына орта есеппен 75 мың еуроға жалға алуға болады.
Мальталық компанияның есептілігіне сәйкес, Piccolino яхтасын сатып алуға 8 млн еуро жұмсалған, ал оны жыл сайынғы күтіп ұстау отбасына 400–900 мың еуро шығын әкелген.
ERG-ден кейінгі Еуропадағы инвестициялар
2022 жылдың шілдесінде қызметінен кеткенге дейін Алдияр Қазтаев ERG-дегі жұмысын Қазақстан триатлон федерациясының президенті лауазымымен қатар алып жүрді. Оның құрметті президенті ҰҚК-нің бұрынғы басшысы Кәрім Мәсімов болған еді, оның кенже қызымен Қазтаев құда түскен деген де мәлімет бар. Дегенмен, оның ресми әйелі Мәдина Мұхамеджанова да жоғары лауазымды қазақстандық күштік құрылым өкілінің, бұрынғы ІІМ басшысы Бауыржан Мұхамеджановтың отбасынан шыққан.
ERG-ден кеткеннен кейін Алдияр Қазтаев түбегейлі Еуропаға қоныс аударған. 2023 жылдың қазан айында жартылай мемлекеттік ERG-дің бұрынғы топ-менеджері өзінің италиялық Anglo Language Mediterranean Academy SRL компаниясы арқылы Сардиниядағы жеке халықаралық мектеп, кампус, бес жұлдызды қонақүй және спорт орталығы жобасына 11 млн еуродан астам қаржы салғаны белгілі болған. Қазақстандық БАҚ деректері бойынша, Бас прокуратураның тексеруінен кейін Алдияр Қазтаевтың Қазақстаннан миллиардтаған долларды заңсыз шығару туралы қылмыстық істің фигуранттары қатарында болуы сол мәмілеге ерекше мән берді. Бұл мәліметті жоққа шығаратын немесе растайтын ресми хабарламалар, сондай-ақ аталған істің аяқталғаны туралы деректер табылмады.
«ERG флотының» сатылымы
Алдияр Қазтаевтың кемесі иесінің ауысуын күтіп тұрған «ERG флотының» қатарында болды. Еуразиялық топтың негізін қалаушылардың бірі Александр Машкевичтің мұрагерлері отбасылық Lady Lara яхтасын 230 млн еуроға сатылымға шығарды. Бұл Машкевичтің ERG бойынша серіктесі Әлижан Ибрагимовтың отбасына тиесілі және кеме брокерлері 240 млн еуроға бағалаған I Dynasty яхтасының құнынан 10 млн еуроға арзан. Қос кеме де бүгінде қайталама нарықтағы ең қымбат ұсыныстар көшін бастап тұр.
Александр Машкевич пен Әлижан Ибрагимовтың отбасылық Lady Lara және I Dynasty яхталары сәйкесінше 230 млн және 240 млн еуроға қайталама нарыққа шығарылды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
