Қонаев қаласында заңсыз айналымға түскен тауарлар ресми түрде жойылды. Қала әкімдігінің мемлекеттік активтер және сатып алу бөлімінің мамандары сот орындаушылары тәркілеген өнімдерді қабылдап, арнайы комиссияның қатысуымен қоқыс полигонында жарамсыз етті, деп жазады Ertenmedia.kz.
Бұл тауарлар «Іле ауданаралық сот актілерін орындау жөніндегі аумақтық бөлімі» арқылы әкімдікке рәсімделіп жіберілген. Яғни, алдымен сот шешімі шығып, тауарлар тәркіленген, содан кейін ғана жою процедурасы іске асқан.
Тізімге қарасақ, заңсыз өнімнің көлемі аз емес. Акцизделмеген 4 тоннадан астам алкогольдік өнім саудаға шығарылмақ болған. Мұндай ішімдіктің сапасы да, шығу тегі де түсініксіз.
Ең бастысы салық пен акциз төленбеген. Оған қоса, Қытайда өндірілген бір тоннадан астам биологиялық белсенді қоспалар анықталған. Көбіне ББҚ-лар «дәрі емес, тағам қоспасы» деген желеумен сатылады. Бірақ оның құрамын ешкім тексермесе, тұтынушы денсаулығына қауіп төндіруі мүмкін. Акцизсіз 80 қорап темекі де тәркіленген тауардың қатарында.
Жою процесі де жабық есік жағдайында емес, комиссияның қатысуымен жүргізілді. Комиссия құрамына санитариялық-эпидемиологиялық бақылау басқармасы, мемлекеттік кірістер басқармасы, кәсіпкерлік бөлімі өкілдері, депутаттар және қоғамдық ұйым мүшелері кірді.
Заңсыз тауарлар қоқыс полигонына жеткізіліп, ауыр техникамен жаншылып, толықтай жарамсыз етілген. Яғни кейін қайта жинап, саудаға шығару мүмкіндігін болдырмау үшін түбегейлі жою жолы таңдалған.
Осындай шараның мақсаты тұрғындарға да нақты сигнал беру. Акцизсіз алкоголь мен темекі, құжатсыз ББҚ сату жеңіл ақша сияқты көрінуі мүмкін, бірақ салдары айыппұлмен немесе мүлікті толық жоғалтумен аяқталады.
