Қызылорда облысының әкімі Нұрлыбек Нәлібаев Аэроғарыш комитеті төрағасының орынбасары Ерден Ибраев және «Инфракос» ШЖҚ РМК бас директоры Назар Көптілеуовпен кездесті, деп хабарлайды Ertenmedia.kz
Басқосуда «Бәйтерек» ғарыштық зымыран кешені құрылысының жай-күйі және туризмді дамыту мәселелері талқыланды.
Былтыр Қызылорда облысына жұмыс сапарымен келген Үкімет басшысы Олжас Бектенов «Бәйтерек» кешенінің құрылысымен танысқан болатын. Аймақ басшысы кездесуде жобаны уақтылы іске асырудың маңызын атап өтті.
«Бәйтерек» ғарыштық зымыран кешені — Қазақстан мен Ресейдің ең ірі бірлескен жобасы. Құрылысты аяқтау 2028 жылдың мамырына, ал алғашқы ұшу сынақтары 2025 жылдың аяғына жоспарланған. Кешеннің жылына 6-8 зымыран ұшыруға мүмкіндігі бар. Жоба «Байқоңырдың» белсенді жұмысын қамтамасыз ету, қала тұрғындарын еңбекпен қамту үшін аса қажет.
Туризмді дамыту және «Байқоңыр» кешенінің мәдени әлеуетін пайдалану бағытында да жұмыс атқарылып жатыр. Қазақстан жағынан туристік қызметті «Бәйтерек» БК» АҚ және «Инфракос» РМК жүзеге асырады.
Қазіргі күні қалаға және ғарыш айлағына электронды форматта рұқсат рәсімдеу, «Байқоңыр» кешенінің туристік нысындарына баруға өтінім ұсыну мерзімін қысқарту мүмкіндігі қарастырылып жатыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
