Шымкентте қазір жалпы құны 900 млрд теңгеге бағаланған ірі жобалар жүзеге асып жатыр. Бұл туралы қала әкімі Ғабит Сыздықбеков Орталық коммуникациялар қызметіндегі брифингте айтты. Оның айтуынша, негізгі басымдық өнеркәсіптік аймақтарды үлкейтіп, инвесторға инфрақұрылымы дайын алаң ұсыну. Сол арқылы жаңа өндіріс ашып, тұрақты жұмыс орындарын көбейту көзделген, деп жазады Ertenmedia.kz.
Ресми мәлімет бойынша, қалада екі жаңа өнеркәсіптік аймақ салынып жатыр, ал бұрыннан бар үш аймақ кеңейтілуде. Дәл осы аумақтарда 300 инвестициялық жоба жүзеге асырылмақ. Барлық жобаның жиынтық құны – 900 млрд теңге.
Жоспарға сәйкес, осы жобалардың есебінен 13 мыңға жуық адам тұрақты жұмыс табады. Индустриялық аймақтың негізгі артықшылығы – жолы, жарығы, суы, газ бен басқа да коммуникациясы алдын ала тартылған дайын алаң болуы. Инвестор үшін бұл уақыт үнемдеу әрі шығынды азайту деген сөз. Әкім бұл жұмыс қала экономикасының ұзақмерзімді ырғағын айқындайтынын атап өтті:
– Өнеркәсіптік аймақтарды кеңейту мегаполис экономикасының ритмін алдағы жылдарға белгілейтін қадам. Инвестор үшін дайын инфрақұрылым негізгі факторлардың бірі. Сондықтан біз жаңа индустриялық аймақтар құрып, бар аумақтарды кеңейтіп, бизнеске шынайы жағдай жасап отырмыз. Бұл тек жұмыс орындарын көбейтумен шектелмейді, қаланың өнеркәсіптік әлеуетін жаңа деңгейге шығарады, – деді Ғабит Сыздықбеков.
Оның сөзінен байқауға болатыны қала әкімдігі қысқа мерзімді эффект емес, ұзақмерзімді база қалыптастыруға көбірек мән беріп отыр. Өйткені индустриялық аймақ бір күнде толып кетпейді, бірақ бір рет дұрыс жасалса, онда ондаған жыл бойы жаңа өндіріс келіп тұрады.
Брифингте екі ірі жобаның аяқталуға жақындағаны да айтылды. Соның біріншісі «Регионалдық хаб» құру жұмыстары. Мемлекет басшысының тапсырмасына сәйкес, Шымкент өңірдегі тауар ағындарын қабылдап, қайта бөліп отыратын ыңғайлы логистикалық орталыққа айналуы тиіс.
Осы мақсатта сауда-логистикалық орталықты кеңейту жобасы жүріп жатыр. Әкімнің айтуынша, кеңейтудің негізгі кезеңі келесі жылы толық аяқталады. Нәтижесінде азық-түлік қауіпсіздігі күшейіп, қойма, тасымал, сақтау, қайта тиеу мүмкіндігі кеңейеді. Бұл жергілікті бизнеске де, сырттан келетін тауар өндірушілерге де жаңа мүмкіндік береді.
Екінші бағыт жеке индустриялық аймақтарды дамыту. Соның бірі «Стандарт» деп аталатын жеке индустриялық аймақ. Әкімнің сөзіне қарағанда, бұл аумақта үлкен өндіріс орындарына арналған алаңмен қатар, шағын өндіріс үшін де арнайы орындар қарастырылған.
Мемлекет сол шағын алаңдарға дейін қажетті электр, су, жол, газ секілді базалық жүйелерді жеткізіп берген. Яғни кәсіпкер ғимаратын салып, құрал-жабдығын әкеліп, сол жерден-ақ жұмысын бастай алады.
Мұндай тәсіл шағын және орта өндіріс үшін ыңғайлы. Өйткені кәсіпкер жер телімін, инфрақұрылым тартуды, техникалық шарттарды ұзаққа созбай, дайын алаңға кіргенді қалайды. Осы арқылы қала бір жағынан ірі инвесторларды, екінші жағынан шағын, бірақ тұрақты өндіріс ашқысы келетін кәсіпкерлерді тарта алады.
900 млрд теңгелік жобалар көлеміне қарасақ, Шымкент тек сауда және қызмет көрсетуге сүйенген қала емес, нақты өнеркәсіп пен логистикаға да басымдық беріп отырғаны байқауға болады. Өнеркәсіптік аймақтарда тек жеңіл өнеркәсіп емес, құрылыс материалдары, өңдеу өнеркәсібі, азық-түлік өндірісі, логистикалық орталықтар сияқты түрлі бағыттағы жобалар орналасады. Мұның бәрі қаланың салық базасын кеңейтеді, жергілікті бюджеттің мүмкіндігін арттырады.
Инфрақұрылымы дайын аймақтарда өндіріс ашу жұмыссыздықты азайтуға да нақты әсер етеді. 13 мың тұрақты жұмыс орны деген тек статистика емес, он үш мың отбасының ай сайынғы табысы тұрақталады деген сөз. Оның жанама әсері де бар: сол адамдар дүкеннен тауар сатып алады, қызмет пайдаланайды, сол арқылы шағын және орта бизнес те дамиды.
Қысқасы, Шымкентте индустриялық аймақтарды кеңейту және жаңа жобаларды іске асыру жұмысы қала экономикасының құрылымын біртіндеп өзгертуде. 900 млрд теңгелік 300 жоба, 13 мың жаңа жұмыс орны, «Регионалдық хаб» және «Стандарт» сияқты алаңдар – осы өзгерістің негізгі элементтері. Енді басты міндет – жобалардың уақытында аяқталуын, инфрақұрылымның сапалы жасалуын және инвестор алдындағы уәделердің орындалуын қамтамасыз ету.
