Жетісу облысында Республика күні мерекесі қарсаңында сегіз медициналық нысан пайдалануға берілді. Осылайша өңірдегі ауыл медицинасына қатысты нақты қадамдар жасалып, Мемлекет басшысының ауылды жерде медициналық қызметтің қолжетімділігін күшейту туралы тапсырмасы сәтті орындалуда, деп хабарлайды Ertenmedia.kz Жетісу облысы әкімінің баспасөз қызметіне сілтеме жасап.
Алыстағы ауылдағы халық көп жағдайда дәрігердің көмегіне жедел жете алмай қиналатын. Соңғы жылдары ауыл мен қала арасындағы әлеуметтік теңгерімді жақсарту туралы жиі айтылады, ал ең әуелі адамның денсаулығына қатысты жағдай өзгерсе, өзге салалардың да өрісі кеңейеді. Жетісу облысында ашылған сегіз медициналық нысан жергілікті тұрғындар үшін жаңа мүмкіндіктің бастауы болып отыр.
Елге қайтарылған активтер есебінен қаржыландырылған медициналық пункттер, фельдшерлік-акушерлік бекеттер мен дәрігерлік амбулаториялар ауыл өміріндегі маңызды өзгерістің белгісі саналады.
Бұрын аудан орталығына жету үшін ұзақ жол жүретін жұрт енді алғашқы медициналық көмекті өз ауылынан алады. Жетісуда жалпы 18 жоба кезең-кезеңімен жүзеге асуда.
Үкімет Арнаулы мемлекеттік қор арқылы 1,7 млрд теңге бөліп, денсаулық сақтау саласының инфрақұрылымын көтеруге мүдделілік танытты. Денсаулық сақтау нысандарының көбеюі тек емдеу қызметі үшін ғана емес, ауылдағы мамандардың жұмысқа тұруына да жол ашады.
Жалғызағаш пен Қайнарда, Сарытөбеде, Жаңалық пен Қараталда, Оян ауылында жаңа медицина орындарының есігі ашылды. Алакөлдің Жайпақ ауылында дәрігерлік амбулатория іске қосылып, Қайнарда фельдшерлік пункт жұмысын бастады.
Әр нысан заманауи техникамен жабдықталып, алғашқы медициналық көмек көрсету стандарттарына сай жасақталған. Ауылдағы емдеу пунктінде білікті маманның болуы, бала көтерген әйелдің, қарт адамның, төтенше жағдайға тап болған тұрғынның дер кезінде көмек алуына әсер етеді. Инженерлік инфрақұрылымға дейін ойластырылғаны жоспардың жүйелі екенін аңғартады.
Ауылдарда ашылған жаңа нысандар 4 мыңнан астам адамның медициналық көмекке қолжетімділігін арттырады деген сенім бар. Бұл тек статистика емес, әр отбасының тағдырына әсер ететін көрсеткіш. Жаңа жұмыс орындары ашылып, жас мамандардың ауылға келуіне мүмкіндік туады. Тұрғындар дәрігерге көріну үшін қалаға сабылудан біртіндеп арылады. Осындай қадамдар арқылы ауылдағы әлеуметтік жағдайдың деңгейі өсіп, халықтың өмір сүру сапасына оң ықпал етеді.
