79 жасына қараған шағында Қазақстанның халық әртісі, ұйғыр театрының жарық жұлдызы, сахнаның сайыпқыраны Рихангүл Махпирова өмірден озды, деп хабарлайды Ertenmedia.
Рихангүл Махпированың шығармашылық жолы Құддыс Қожамияров атындағы республикалық мемлекеттік академиялық ұйғыр музыкалық комедия театрымен тығыз байланысты.
Ол сахна төріне алғаш рет 1977 жылы шығып, содан бері ұлттық өнердің алтын қорына енген талай ерекше әрі шынайы бейнелерді сомдады. Ұлттық театр сахнасының дамуына қосқан өлшеусіз үлесі үшін актриса Қазақстанның еңбек сіңірген әртісі, кейінірек Қазақстанның халық әртісі атағын иеленді.
Мәдениет және ақпарат министрлігі әртістің туған-туыстарына, жақындары мен өнер сүйер қауымға көңіл айтты.
Ведомство өкілдері Рихангүл Махпированың өнерге адал, сахнаға ғұмырын арнаған жарқын тұлға екенін атап өтті.
