Шымкентте шұғыл төтенше жағдайға жауап беретін қызметтердің жұмысы жаңа деңгейге көтерілді. Еңбекші ауданының Елтай тұрғын алабында алғашқы әмбебап кешеннің ашылуы осының айғағы. Ресми мәліметке сүйенсек, мұндай үлгідегі нысан Қазақстанда бұрын болмаған. Ашылу рәсіміне Шымкент қаласының әкімі Ғабит Сыздықбеков пен ҚР Төтенше жағдайлар министрі Шыңғыс Арынов қатысты. Олар кешенді аралап көріп, мамандармен сөйлесті, жүйенің қалай жұмыс істейтінін өз көздерімен бақылады, деп жазады Ertenmedia.kz.
Жаңа кешенде полиция, төтенше жағдай қызметі, өрт сөндіру және жедел жәрдемді бір алаңға жинау. Бұрын әр қызмет қала ішінде әр жерде орналасып, оқиға орнына бөлек шықса, енді олар бір нүктеден қатар шыға алады. Бұл уақыт ұтуға, өзара байланыс пен ақпарат алмасуды жеделдетуге мүмкіндік береді. Министр Шыңғыс Арынов бұл моделдің мәнін түсіндіріп, ашық айтты:
– Алғаш рет қызметтер бірігіп жұмыс істейтін депо ашылып отыр. Бұл бүкіл ел үшін үлгі болатын бастама. Полиция, медицина және төтенше жағдайлар қызметі бір сапта тұрып, қауіп-қатерге бірге қарсы тұруы – біздің басты принципіміз. Қызметтеріңізге сәттілік тілеймін, – деді ол.
Елтайдағы жаңа кешен 3309 шаршы метр ғимараттан және 7 мың шаршы метр жер телімінен тұрады. Ішінде қызметкерлерге арналған кабинеттер, оқу мұнарасы, арнайы техникаларға арналған бокстар және маневр жасауға арналған алаң бар.
Кешенде тәулік бойы 50-ге жуық маман кезекшілік атқарады. Олар Елтай, Маятас, Тоғыс және Айнатас тұрғын алаптарының тұрғындарына қызмет көрсетеді. Ресми есеп бойынша, бұл аумақта 25 мыңнан астам адам тұрады.
Кешен модульдік үлгіде салынған. Жобаны жергілікті бюджет есебінен қаржыландырылып, алты айдың ішінде салынды. Әкімдік өкілдері бұл жерде тек кезекшілік емес, оқу-жаттығу жұмыстары да тұрақты өтетінін айтты. Яғни нысан тек дайын тұрған техника емес, мамандарды үнемі шынықтыратын база ретінде де қарастырылып отыр. Қауіпсіздік саласында нәтиже көбіне жабдыққа емес, адамдардың тәжірибесіне байланысты екені белгілі.
Салтанатты шара барысында төтенше жағдай саласын дамытуға үлес қосқан азаматтар марапатталды. Министрдің алғыс хаты Шымкент әкімінің бірінші орынбасарына және бірқатар қалалық басқарма басшыларына табыс етілді. Сондай-ақ ардагерлер мен сала қызметкерлері «ТЖМ-ге 30 жыл» мерекелік медалімен марапатталды. Бұл қадам жүйеде ұзақ жыл еңбек еткен мамандардың еңбегін құрметтеудің бір белгісі ретінде қабылданды.
Жергілікті жұртшылық жаңа кешеннің ашылуын қауіпсіздік тұрғысынан маңызды оқиға деп бағалап отыр. Қазығұрт тұрғын алабы ақсақалдар кеңесінің төрағасы Батырхан Әшетов жағдайды былай түсіндірді:
– Бұрын төтенше жағдай болған кезде қызметтердің жетуі ұзаққа созылатын. Енді бәрі бір жерде. Ең алыс нүктеге де 7 минуттың ішінде жете аламыз деп жатыр. Бұл халық үшін өте қажет бастама, – деді ол.
Кешен іске қосылған соң, төтенше жағдай, өрт, жол апаты немесе медициналық жедел көмек қажет болған кезде тұрғындарға жақын жерден бірден бірнеше қызмет қатар қозғала алады. Бұл жүйе әсіресе шеткі тұрғын алаптар үшін маңызды. Қала орталығына дейін барып қайтатын уақыттың орнына, қызметтер Елтайдың өзінен шығып, маңайдағы ауылдарға да жылдам жетеді.
Шымкент әкімдігі мұндай кешендермен шектеліп қалмауды жоспарлап отыр. Ресми мәлімет бойынша, жыл соңына дейін осындай тағы екі модульдік кешен ашылмақ. Ал келесі жылы тағы жеті нысанның құрылысы аяқталады. Егер жоспар толық орындалса, Шымкенттегі шұғыл қызмет жүйесі түгел жаңарып, қала картасында қауіпсіздік бойынша жаңа инфрақұрылым қалыптасады.
Қарапайым тілмен айтқанда, Елтайдағы кешен белгілі бір ауданды ғана емес, бүкіл қаланы өзгерте бастайтын алғашқы қадам. Шымкент ұлғайып келеді, тұрғын саны да, көлік саны да өсіп жатыр. Осындай жағдайда қауіпсіздік жүйесін ескі үлгіде ұстау қиын. Жаңа кешендер уақыт үнемдеуге, қызметтің сапасын арттыруға, ең бастысы төтенше жағдайға тап болған адамға дер кезінде көмек көрсетуге бағытталған. Жүйе нақты жұмыс істесе, оның пайдасын бірінші болып тұрғындар сезеді.
