Шымкент қаласында басты жаңа жылдық шыршаның шамдары жағылып, мегаполис жаңа жылдың табалдырығын ерекше көңіл күймен аттады, деп жазады Ertenmedia.kz.
Шыршалар Шымкенттің бес ауданында бір мезетте жағылды
Шаһардың «Астана» алаңында өткен салтанатты шараға мыңдаған қала тұрғындары мен қонақтары жиналды. Биыл бұл мереке алғаш рет жаңа форматта ұйымдастырылып, бұрынғы жылдармен салыстырғанда ауқымы мен мазмұны жағынан өзгеше сипат алды.
Салтанатты кешке Шымкент қаласының әкімі Ғабит Сыздықбеков қатысып, тұрғындарды келе жатқан жаңа жылмен құттықтады.
Жаңа жылдық шырша жағу қала өміріндегі маңызды дәстүрдің бірі. Бұл кеш тек жарық жағумен шектелмей, адамдарды бір алаңға жинап, ортақ қуаныш пен үмітке ұйыстыратын сәтке айналды.
Биылғы ерекшелік – жаңа жылдық шыршалар Шымкенттің бес ауданында бір мезетте жағылды. Еңбекші ауданында «Алатау» саябағында, Әл-Фараби ауданында Арбатта, Тұран ауданында «Достық үйі» аумағында, Абай ауданында «Наурыз» алаңында және Қаратау ауданында «Астана» алаңында мерекелік шамдар бір уақытта жарқырады.
Астана алаңы сол кеште нағыз мерекелік кеңістікке айналды. Түрлі түсті жарықтар, арнайы безендірілген инсталляциялар, әсем әуендер алаңға келген жұрттың көңілін көтерді.
Балалар үшін аттракциондар орнатылып, алаң аумағына сексеннен астам шырша қойылды. Бұл көрініс қысқы мерекенің әсерін күшейтіп, қала тұрғындарына ертегідей әсер сыйлады.
Бұл кеш тек мерекелік шара емес, қала өміріндегі маңызды әлеуметтік оқиға болды. Алаңға келген адамдар күнделікті күйбеңнен бір сәтке болса да алыстап, жақындарымен бірге қуаныш бөлісті.
Алаңды ән мен әуен керенеді
Балалар үшін бұл – есте қалатын әсер, ал ересектер үшін жылды түйіндеп, алдағы күндерге ой жүгіртетін мүмкіндік. Осындай кештер қаладағы ортақ рухты нығайта түсетіні анық.
Негізгі рәсім басталардан бір сағат бұрын мұз айдынында мәнерлеп сырғанаудан көрсетілімдер өтті. Мұз үстінде халықаралық және республикалық жарыстардың жеңімпаздары мен жүлдегерлері өнер көрсетті. Қысқа және еркін бағдарламалар, топтық би қойылымдары көрерменнің ерекше ықыласына бөленді. Бұл көріністер мерекелік кештің әсерін арттырып, салтанатты сәтке жақсы кіріспе болды.
Кештің шарықтау шегі концерттік бағдарламаға ұласты. Шымкенттік және елімізге танымал өнерпаздар сахнаға шығып, көрерменге көтеріңкі көңіл күй сыйлады. Ән мен әуен алаңды толтырып, адамдардың бір-біріне жылы тілек айтуына себеп болды. Қала тұрғындары бұл кешті жаңа жыл алдындағы ең әсерлі сәттердің бірі ретінде қабылдады.
Қала әкімінің тапсырмасымен Шымкентте алғаш рет ашық аспан астындағы мұз айдындары ашылды. Бұл бастама қыс мезгілінде белсенді демалысты дамытуға бағытталған. Мұз айдындары қала тұрғындарына қолжетімді болып, отбасылық демалыстың жаңа түрін қалыптастырып отыр. Алдағы уақытта мұндай нысандардың саны арта түсуі мүмкін.
Алдағы күндері Шымкентте түрлі мәдени және ойын-сауық шаралары жалғасады. Қала билігі тұрғындар мен қонақтардың жаңа жылды жақсы көңіл күймен қарсы алуына жағдай жасауды көздеп отыр. Осындай мерекелік кештер мегаполистің тіршілігін жандандырып, адамдарды бір-біріне жақындата түседі. Шымкент биыл да жаңа жылды жарықпен, жылулықпен және ортақ қуанышпен қарсы алды.
