Астанада өткен Silk Way Star вокалдық жобасы көрермендер тарапынан үлкен қолдауға ие болды. Бүгінде Қазақстан Азияның мәдени төрі болуға талпынып отырған ел. Осындай кезде әрбір ән, әрбір сахнаға шыққан орындаушы халықтың атынан сөйлейді. Жобаның финалында Моңғолия әншісі Мишель Джозеф жеңімпаз атанды. Өз елінің рухын таныта білді. Бірақ жеңімпаз тек ол емес, әр сахнаға шыққан жеті елдің мәдениеті де осы кеш арқылы бір баспалдаққа көтерілді.
Он эпизодқа созылған жобаны миллиондаған көрермен бақылап отырды. Бұл әншілер жарысынан гөрі, Азияның бір-бірін тану процесіне көбірек ұқсады десек болады. Финал сахнасында Президент Қасым-Жомарт Тоқаевтың құттықтауын Мемлекеттік кеңесші Ерлан Карин оқыды. Онда «Silk Way Star – елдер арасындағы достықтың көпірі» деп нақты айтылды. Баяғы «жұмсақ күш» деген түсінік қазіргі таңда ән өнері арқылы іске аса бастағанын көрдік.
Сахнаға шыққан артистер Армения, Грузия, Қазақстан, Қытай, Малайзия, Моңғолия, Өзбекстаннан келген әншілер. Әрқайсысы өз тілінде ән айтты. Бұл тәсіл көрерменге ұнады. Себебі әр елдің даусы сезілді. Ең қызығы – финалдық образдарды, сахналық қойылымдарды қазақстандық командалар дайындаған. Визуалдық шешім, стилі, сахнаның көркемдік деңгейі – дүниежүзілік стандартқа жақын болды.
Жобаның мәнін күшейткен сөздердің бірі Ішкі істер министрі Ержан Сәденовтің пікірі. Ол жобаны мәдени қауіпсіздік пен ұлттық имидж тұрғысынан бағалады. Министрдің сөзін сақтап, редакциялап береміз:
– Мәдениет сахнада ғана өлшенбейді. Ән – елдің өз келбетін танытатын құрал. Қазіргі заманда ұлттық қауіпсіздік тек шекара күзетімен шектелмейді. Біз халықаралық жобалар арқылы елдің беделін нығайтып, мәдениетімізді қорғауымыз керек. Silk Way Star сияқты жобалар – мәдени профилактика. Осындай жобалар үлкейсе, Қазақстанды сырт көз тек география ретінде емес, мәдени күш ретінде тани бастайды. Біз мәдениет арқылы да қауіпсіздік қалыптастыруымыз керек, – деді министр.
Осы сөзден кейін кей депутаттар «мұндай жобаларға бюджет шығыны қанша?» деген сұрақ қойды. Министр жауапсыз қалдырмады:
– Бұл жерде шығыннан бұрын пайда туралы ойлау қажет. Жобаға 12 ел қатысты. Әр ел өз өнерпазын, телеарнасын жіберді. Қазақстан жобаны ұйымдастырушы ел ретінде халықаралық аренада абырой жинады. Мемлекет жұмсаған ақшадан әлдеқайда көп ақпараттық пайда алды. Егер мұндай мәдени дипломатия жалғасса, Қазақстан туризм, медиа, имидж саласында ұтатынын нақты көреміз, – деп жауап берді Ержан Сәденов.
Silk Way Star жобасы қатардағы байқау емес. Жобаның құрылымы мен форматы Еуровидениеге теңестіріле бастады. Ал Қазақстан бұл жолы тек қатысушы емес, негізгі ұйымдастырушы деңгейінде көрінді. Қатысушы 12 елдің өкілдері финалды өз тілдерінде эфирге шығарды. Jibek Joly арнасынан бөлек, Тәжікстан, Қырғызстан, Әзербайжан, Моңғолия телеарналары да тікелей көрсетілім жасады.
Мәдениет арқылы елдің бейнесін түзету бұрын дипломаттардың ісі саналатын. Қазір сахнаға шыққан әрбір әнші – елшілерден кем болмады. Қытайлық медиа корпорациямен жұмыс, түрік тарапымен телекөпір, Малайзияның финалға дейінгі ықыласы – осының бәрі әншілік жарыстан саяси мәні басым шара екенін көрсетті.
Silk Way Star егер жүйелі жалғасса, Қазақстан мәдени картада жаңа орында көрінуі мүмкін. Бұған себеп бір жеңімпаз емес, әр сахнада ел рухын танытқан өнерпаздар. Әр елдің өз үні болды. Ал біздің міндет – сол үнді тыңдай білетін мәдени кеңістік болу.
