Nest пайда болғанға дейін термостат көпшілік үшін көзге түсе бермейтін қарапайым тұрмыстық құрал еді. Оны ешкім ерекше дизайн нысаны немесе технологиялық серпіліс әкелетін құрылғы ретінде қарастырмады, деп жазады Ertenmedia.kz.
Алайда iPod жобасының басында тұрған Тони Фаделл мұнымен келіспеді. Ол инженер Мэтт Роджерспен бірге 2010 жылы Nest Labs компаниясын құрып, күнделікті қолданылатын заттар да сапалы дизайн мен ақылды технологияға лайық деген ұстанымды алға шығарды.
Nest сол кезеңде қарапайым үй құрылғыларына жаңа көзқарас әкелді. Компания термостатты тек температура реттейтін құрал ретінде емес, адамның күнделікті тіршілігіне бейімделетін, үй интерьеріне жарасатын заманауи құрылғы ретінде ұсынды. Осы тәсіл Nest-ті қысқа мерзім ішінде технология нарығындағы ерекше атауға айналдырды.
2014 жылдың қаңтарында Google Nest компаниясын 3,2 миллиард долларға сатып алды. Сол мәміле арқылы Google ақылды үй сегментінде мықты орын алды. Дәл сол тұста «заттар интернеті» деген ұғым жай теориялық әңгімеден нақты нарықтық бағытқа айналып келе жатқан еді. Nest-тің термостаттары, камералары, есік қоңыраулары мен түтін датчиктері ақылды үйдің алғашқы шынайы элементтерінің бірі болды.
Кейін Nest өнімдері Google Nest брендімен жұмыс істей бастады және Google Home экожүйесіне толық кіріктірілді. Компанияның ең танымал өнімі әлі де Google Nest термостаты болып саналады. Ол үйдегі адамдардың күнделікті тәртібін бірнеше күннің ішінде үйреніп, температураны соған сай автоматты түрде өзгерте алады. Яғни пайдаланушы әр жолы қолмен баптау жасамай-ақ, үй ішіндегі жайлылықты жүйе өзі реттейді.
Google үшін бұл сатып алу жай ғана жаңа өнімді иемдену емес еді. Компания осы арқылы тікелей адамның үй кеңістігіне кірді. Сол уақытта Amazon да Alexa арқылы өз ақылды үй стратегиясын белсенді құрып жатқан. Сондықтан Nest-ті сатып алу технологиялық бәсекедегі маңызды қадам болды. Яғни Google тек құрылғы сатып алған жоқ, болашақтағы нарыққа алдын ала орын дайындады.
Қарапайым термостаттан басталған Nest тарихы ақылды үй индустриясының қалай қалыптасқанын жақсы көрсетеді. Бір кезде жай ғана қабырғада тұратын құрылғы бүгінде тұтас цифрлық экожүйенің бір бөлігіне айналды. Google-дың Nest-ті сатып алуы да сол өзгерістің ең маңызды кезеңдерінің бірі болып қалды.
Google десе көпшіліктің ойына әлі күнге дейін іздеу жолағы ғана келеді. Бірақ компанияның ресми өнімдер тізімі мен тауар белгілері мүлде басқа көріністі аңғартады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
