Үшқоңыр жайлауында Назарбаевтар әулетіне тиесілі кемі 9 мың гектар жер мемлекет меншігіне өткен. Бұл туралы «Азаттық» жазды, — деп хабарлайды ErtenMedia.
Басылым мәліметінше, бұрынғы президент Нұрсұлтан Назарбаевтың «Байтау» қорына қарайтын Үшқоңыр резиденциясының айналасындағы кемі 9 мың гектар жер мемлекеттік «Қайтарылған активтерді басқару компаниясы» балансына өткен. Бұл ақпарат Бірыңғай мемлекеттік жылжымайтын мүлік кадастрында көрсетілген.
«Алматы облысы Қарасай ауданы Шамалған ауылына қарасты үш жер телімі 2023 жылы Қайрат Сатыбалдыдан Нұрсұлтан Назарбаевқа берілген резиденцияны айнала қоршап жатыр. Бұл — Үшқоңыр жайлауындағы Болат Назарбаев жеке компаниялары арқылы иемденген аумағы ең үлкен жерлер. Жалпы көлемі 9 мың гектардан асады.
Жер учаскелері 2022 жылы Болат Назарбаевтың Prime Capital Holding деген компаниясына тиесілі кәсіпорындардың меншігінде болған. Қазір бұл компания Болат Назарбаевтың ұлы Нұрбол Назарбаевқа қарайды», — деп жазылған ақпаратта.
Жер телімдері мемлекетке қашан қайтарылғаны беймәлім. Бұл жөнінде жария хабарланған жоқ. «Қайтарылған активтерді басқару компаниясының» Азаттыққа берген жауабына қарағанда, қайтарылған жерлердің бұрынғы иесі туралы мәлімет «құпия» сақталады.
«Заңсыз иемденілген активтерді мемлекетке қайтару туралы» заң мен Қаржы министрлігінің активтерді басқару тәртібі бойынша компания қайтарылған активтер иесінің жеке мәліметтерін құпия сақтайды», – деп жазылған компания жауабында.
Басылым ақпаратына сүйенсек, аумақтық бөлініске сәйкес Шамалған ауылдық округіне қарайтын Үшқоңыр жайлауында Назарбаевтар әулетінің жеке иелігенде және уақытша пайдалану құқығында бұдан басқа да көлемі кішірек учаскелер болған.
«Кадастр базасына сәйкес ол жылжымайтын мүліктер де ішінара мемлекетке өткен. Солардың үлкенін «Қайтарылған активтерді басқару компаниясы» 20 ақпанда 127 млн теңгеге сатуға шығарды. Учаске аумағы 142 гектардан асады.
Үшқоңыр жайлауындағы резиденция мен ғимарат орналасқан шағын жер учаскесі бұрынғы президент Нұрсұлтан Назарбаевтың иелігінде қалып отыр. Экс-президент бұл жылжымайтын мүлікті «Байтау» қоры мен «Smart investments» ЖШС арқылы меншіктеп отыр», — деп жазылған мәліметте.
